Եվրոպական հանձնաժողովի նախագահ Ուրսուլա ֆոն դեր Լայենը պատրաստվում է հուլիսի 1-ին այցելել Հայաստան, հայտնել է Politico-ն՝ հղում անելով եվրոպական բարձրաստիճան աղբյուրներին։
Նշվում է, որ այցի կոնկրետ ծրագրերը դեռ վերջնականապես չեն հաստատվել, սակայն այն հստակորեն ուղղված է աջակցելու խորհրդարանական ընտրությունների արդյունքում վերընտրված Հայաստանի գործող կառավարությանը։ Ըստ աղբյուրի՝ այցն ուղերձ է այն մասին, որ Եվրոպան ՀՀ-ի կողքին է։
«Մենք տեսել ենք, որ երկիրը գտնվում է Ռուսաստանի ուժգին և հետևողական ճնշման տակ. այցը աջակցության ուժեղ ազդակ կհաղորդի՝ շարունակելով արդեն իսկ տրամադրված գործնական աջակցությունը»,- ասել է առաջիկա այցի վրա աշխատող ԵՄ պաշտոնյաներից մեկը։
Ըստ հրապարակման՝ ԵՄ պատվիրակության կազմում կլինի նաև ԵՄ ընդլայնման հարցերով հանձնակատար Մարթա Կոսը։
Ըստ լրատվականի՝ այցի պատճառով Բրյուսելը չեղարկել է հուլիսի 1-ին նախատեսված Եվրահանձնակատարների կոլեգիայի նիստը։ Պարբերականի երկու աղբյուրների համաձայն՝ սա հանգեցրել է մի շարք օրենսդրական նախաձեռնությունների քննարկման հետաձգմանը՝ ներառյալ պաշտպանական արդյունաբերության, միասնական շուկայի և պետական գնումների։
Ֆոն դեր Լայենի այցը Հայաստան կլինի երկրորդը վերջին 2 ամսվա մեջ, Հանձնաժողովի նախագահը Երևանում էր մայիսին եվրոպական քաղաքական համայնքի գագաթնաժողովին, որից հետո մասնակցել էր ԵՄ-Հայաստան անդրանիկ գագաթնաժողովին։
ԵՄ-ն Հայաստանին 34 միլիոն եվրոյի անհետաձգելի աջակցություն էր հատկացրել՝ Ռուսաստանի կողմից սահմանված առևտրային սահմանափակումների հետևանքները մեղմելու նպատակով՝ որպես նախկինում հայտարարված 50 միլիոն եվրոյի աջակցության փաթեթի առաջին տրանշ։
Ռուսական սահմանափակումների ֆոնին Հայաստանի իշխանությունները հունիսի սկզբին հայտարարել էին այլ երկրներ արտահանման հնարավորության և ՌԴ սահմաններից վերադարձվող ապրանքների սուբսիդավորման մասին։ Միաժամանակ, Երևանից ընդգծել էին, որ նպատակ չունեն ռուսական շուկայից արտահանումը վերաուղղել դեպի Եվրոպա։
Հունիսին Հայաստանից Լատվիա էր արտահանվել 5500, Լիտվա՝ 11 000, իսկ Ուկրաինա՝ 9500 ծաղիկ։ «Ռոսսելխոզնադզորում» նշել էին, որ 2025-ին ՌԴ-ում ծաղիկների ներմուծման ծավալը կազմել էր 96,2 մլն (հատ)։ ՀՀ վիճակագրական կոմիտեի տվյալներով՝ մինչ այժմ հայկական խմիչքների, սննդամթերքի և ծաղիկների արտահանման 84%-ից մինչև 98%-ն ուղղվել էր ռուսական շուկա։
Կարդացեք նաև՝
Ծաղիկները սպասում են ընտրություններին
