ՄԱԿ-ի անկախ միջազգային քննիչ հանձնաժողովը մեղադրել է Իսրայելին պաղեստինցի երեխաներին կանխամտածված թիրախավորու մեջ, ինչը Գազայում հանգեցրել է ցեղասպանության, մարդկության դեմ հանցագործությունների և ռազմական հանցագործությունների, հայտնում է The Independent-ը։
Զեկույցը հրապարակել է ՄԱԿ-ի անկախ միջազգային քննիչ հանձնաժողովը՝ օկուպացված պաղեստինյան տարածքի, ներառյալ՝ Արևելյան Երուսաղեմի և Իսրայելի հարցերով։ Այն վերաբերում է պաղեստինցի երեխաների նկատմամբ խախտումներին՝ 2023 թվականի հոկտեմբերի 7-ին Իսրայելի և ՀԱՄԱՍ-ի միջև պատերազմի սկսվելուց հետո։
Հանձնաժողովի տվյալներով՝ Գազայի պատերազմում զոհվածների մոտ 30%-ը երեխաներ են։ Զեկույցում նշվում է, որ 2023 թվականի հոկտեմբերի 7-ից մինչև 2025 թվականի հոկտեմբերի 7-ը զոհվել է առնվազն 20 179 երեխա։
Հանձնաժողովը հայտարարել է, որ պաղեստինցի երեխաները պատերազմի ընթացքում դիտավորյալ թիրախավորվել և սպանվել են, այդ թվում՝ 2025 թվականի հոկտեմբերին հրադադարի ուժի մեջ մտնելուց հետո։ Ըստ հանձնաժողովի՝ սա Իսրայելի իշխանությունների և անվտանգության ուժերի ցեղասպան մտադրությունը հաստատող առանցքային տարրերից է։
«Ապացույցները ցույց են տալիս, որ պաղեստինցի երեխաները դիտավորյալ թիրախավորվել և սպանվել են իսրայելական անվտանգության ուժերի կողմից»,- զեկույցին կից հայտարարության մեջ ասել է հանձնաժողովի նախագահ Սրինիվասան Մուրալիդհարը։
Զեկույցում նաև նշվում է, որ Գազայում Իսրայելի ստեղծած պայմանները, այդ թվում՝ լայնածավալ հարձակումները, կրկնվող տեղահանությունը և օգնության, սննդի ու դեղորայքի շրջափակման հետևանքով առաջացած սովը, ծանր վնաս են հասցրել երեխաների առողջությանն ու զարգացմանը։
Իսրայելի առաքելությունը Ժնևում մերժել է հանձնաժողովի եզրակացությունները՝ զեկույցն անվանելով «զրպարտչական»։ Իսրայելական կողմը հայտարարել է, որ մերժում է երեխաներին դիտավորյալ թիրախավորելու մասին պնդումները և նշում, որ զեկույցն անտեսում է ՀԱՄԱՍ-ի գործողությունները։
Գազայի պատերազմն սկսվել էր 2023 թվականի հոկտեմբերի 7-ին՝ Իսրայելի հարավի վրա ՀԱՄԱՍ-ի հարձակումից հետո, որի հետևանքով, ըստ իսրայելական տվյալների, զոհվել էր մոտ 1200 մարդ, շուրջ 250-ը պատանդ էր վերցվել։ 2025 թվականի հունվարի 19-ին կողմերի միջև հրադադար էր ուժի մեջ մտել, սակայն մարտի 18-ին Իսրայելը վերսկսել էր հարվածները Գազայի ուղղությամբ։
2024 թվականի մայիսի 20-ին Միջազգային քրեական դատարանի դատախազ Քարիմ Խանը միջնորդություն էր ներկայացրել Իսրայելի վարչապետ Բենիամին Նեթանյահուի, Պաշտպանության նախկին նախարար Յոավ Գալանտի և ՀԱՄԱՍ-ի երեք առաջնորդի ձերբակալության օրդերներ տրամադրելու համար։ Նոյեմբերի 21-ին ՄՔԴ-ն օրդերներ էր տրամադրել Նեթանյահուի, Գալանտի և Մոհամեդ Դեյֆի նկատմամբ։
