Կրեմլում հնարավոր որոշում է կայացվել սահմանափակել գործող վարչակազմի հետ փոխկապակցված բիզնեսների, ընկերությունների և մշակութային կազմակերպությունների գործունեությունը Ռուսաստանի տարածքում, գրել է «Հրապարակ» օրաթերթը՝ հղում անելով իր աղբյուրներին։
Թերթը տեղեկացրել է, որ ապրիլի 7-ին «Ռոսալկոգոլտոբակկոնտրոլ»-ը դիմել էր դատարան՝ պահանջելով «Պռոշյանի կոնյակի գործարանի» լիցենզիայի դադարեցում և դրա հիման վրա ՌԴ արտահանվող ալկոհոլային խմիչքների արտահանման կասեցում։
Պարբերականի փոխանցմամբ՝ այս որոշումը հնարավոր է կապ ունենա Ռուսաստանի և Հայաստանի ղեկավարներ Վլադիմիր Պուտինի և Նիկոլ Փաշինյանի՝ ապրիլի 1-ին կայացած հանդիպումից հետո լարված զրույցին։
Ըստ թերթի՝ պաշտոնական Մոսկվան հանգել է այն կարծիքին, որ Փաշինյանի հետ պայմանավորվածությունների ձեռքբերումն այս փուլում հնարավոր չէ, ինչի պատճառով էլ ռուսական կողմն անցել է գործնական քայլերի։
Լրատվամիջոցը նաև նշել է, որ ստեղծված իրավիճակում ՌԴ-ում ՀՀ դեսպան Գուրգեն Արսենյանն ու նրա շրջապատն են հայտնվել «անցանկալի անձանց կարգավիճակում» (պերսոնա նոն գրատա), չնայած ռուսական կողմի հետ ունեցած նախկին կառուցողական հարաբերություններին։
Ավելի ուշ Ազգային ժողովում Պետական եկամուտների կոմիտեի նախագահ Էդուարդ Հակոբյանը նշել է, որ մամուլում հրապարակված տեղեկություններից բացի ՌԴ-ի կողմից հնարավոր սահմանափակումների վերաբերյալ ՊԵԿ-ը բողոքներ չունի տնտեսվարողներից։
«Նման բողոքներ, որպես այդպիսին, չունենք։ Բայց ուզում եմ հիշեցնել, որ այն, ինչի մասին խոսվում է, նոր երևույթ չէ։ Մենք պատմության ընթացքում պարբերաբար նման խնդիրներ ունեցել ենք»,- ասել է նա՝ հիշեցնելով 2025-ին Հայաստանից արտահանվող ծաղիկների նկատմամբ ՌԴ-ի սահմանափակումները։
ՊԵԿ նախագահը շեշտել է, որ տարբեր ապրանքների դեպքում ՌԴ-ի պահանջները պարբերաբար խստացվում կամ թուլացվում են, ինչը բնականոն գործընթաց է։ Նա խնդիրներից խուսափելու համար տնտեսվարողներին հորդորել է հետևել ՌԴ-ի պահանջներին։
Հակոբյանը նաև նշել է, որ տեղյակ չէ «Պռոշյանի կոնյակի գործարան» ՍՊԸ-ի հետ կապված ռուսական կողմի հայցից։ Նա, լրագրողի դիտարկմանն ի պատասխան, ասել է, որ առաջին անգամ է լսում այդ մասին։ Նա խոստացել է ուսումնասիրել խնդիրը։
Փաշինյանն ու Պուտինը Մոսկվայում քննարկել էին հայ-ռուսական տնտեսական համագործակցությունը, Հայաստանի հարաբերությունները ԵՄ-ի հետ, խորհրդարանական ընտրությունները և Ադրբեջանի հետ կարգավորման գործընթացը: Հանդիպման բաց հատվածը տևել է մոտ 40 րոպե, փակը՝ մոտ 2 ժամ:
Գնահատելով հանդիպման արդյունքները՝ Հայաստանի խորհրդարանի նախագահ Ալեն Սիմոնյանը հայտարարել էր, որ Փաշինյանը Մոսկվայում հանդես է եկել անկախ և ինքնիշխան պետության դիրքերից: Ռուսական կողմից ՌԴ նախագահի մամուլի քարտուղար Դմիտրի Պեսկովը զրույցն անվանել էր անկեղծ, իսկ ՌԴ արտգործնախարար Սերգեյ Լավրովը նշել էր, որ Երևանը հասկացել է Մոսկվայի մտահոգությունները:
Կարդացեք նաև՝
Ռուսաստանի կարգավորիչը հայց է ներկայացրել «Պռոշյանի կոնյակի գործարանի» դեմ՝ խախտումների պատճառով
Թարմացված է՝ 8.04.2026 | 14:56
