ՀՀ Ազգային ժողովն այսօր 1-ին ընթերցմամբ մերժել է Քրեական օրենսգրքում փոփոխություններ կատարելու մասին նախագիծը, որով առաջարկվում է քրեականացնել Հայոց ցեղասպանության ժխտումը։
«Հայաստան» խմբակցության առաջարկած նախագծին դեմ է քվեարկել 58 պատգամավոր, կողմ` 26, ձեռնպահ` 2։ Նախագիծը չի ընդունվել։ «Քաղաքացիական պայմանագիր» կուսակցությունը ևս դեմ է քվեարկել նախագծին։
Ընդդիմության նախաձեռնությունը նպատակ ուներ Քրեական օրենսգրքի 136-րդ հոդվածը դարձնել «ավելի գործնական»՝ հստակ սահմանելով այն սուբյեկտներն ու իրավիճակները, որոնց դեպքում կիրառվում է քրեական պատասխանատվություն: Օրինագծի հեղինակները նշել են, որ չնայած Հայոց ցեղասպանության ժխտման կամ արդարացման բազմաթիվ հանրային դեպքերին՝ դեռևս որևէ գործ չի հարուցվել այդ հոդվածի հիման վրա։
«Հայաստան» խմբակցության ղեկավար Սեյրան Օհանյանը բացատրել էր Ցեղասպանության ժխտման մասին օրենքը խստացնելու անհրաժեշտությունը՝ մեջբերելով «իշխանությունների կողմից ստեղծված վտանգները»։ Նա նշել էր, որ ներկայիս կառավարության օրոք ցեղասպանությունը շարունակվել է Արցախի դեմ. Ադրբեջանն այն իրականացրել է բռնի տեղահանման միջոցով, մինչդեռ «Թուրքիան և ադրբեջանա-թուրքական տանդեմը, մեղադրյալ լինելու փոխարեն, դարձել են մեղադրողներ»։
«Քաղաքացիական պայմանագիրը», սակայն, նշել էր, որ գործող հոդվածը փոխելու անհրաժեշտություն չկա։ Խմբակցության քարտուղար Արթուր Հովհաննիսյանն առաջարկվող փոփոխություններն անվանել էր «կեղծ օրակարգ»։
