ՌԴ ԱԳՆ խոսնակ Մարիա Զախարովան տարակուսանք է հայտնել Երևանում ՌԴ դեսպանին բողոքի նոտա հանձնելու առնչությամբ՝ հունվարի 12-ին «Վեստի Նեդելի» հաղորդաշարի թողարկումից հետո, որտեղ հաղորդավար Դմիտրի Կիսելյովը քննադատել է Հայաստանի իշխանություններին։
Զախարովան նշել է, որ խոսքը ոչ թե պետական գործչի, այլ լրագրողի հայտարարությունների մասին է։
«Երևանից միշտ լսել ենք, որ Հայաստանը հավատարիմ է խոսքի ազատությանը, և Հայաստանի ներկայիս ղեկավարությունը դա դարձրել է իր հրամայականը»,- ասել է Զախարովան:
Նա ընդգծել է, որ Ռուսաստանի պաշտոնական դիրքորոշումն է աջակցել Հարավային Կովկասում բոլոր տրանսպորտային և տնտեսական կապերի հնարավորինս շուտ ապաշրջափակմանը և «ամենաբարձր մակարդակով եռակողմ համաձայնագրերին հետևելուն»։
Հունվարի 12-ին Կիսելյովի եզրափակիչ հաղորդման ընթացքում ներկայացվել էր հայ-ադրբեջանական հարաբերությունների և ԵՄ-ին միանալու գործընթացի մեկնարկի և Ֆրանսիայից զենքի մատակարարումների մասին զեկույցը։
Այս ամենը, ըստ «Վեստի նեդելի» հաղորդաշարի հաղորդավարի, «ակնհայտ» նախապատրաստություն է նոր պատերազմի։ Կիսելյովը հայտարարել էր, որ ՀՀ վարչապետ Նիկոլ Փաշինյանն անտեսել է և՛ իր պարտավորությունը 2020 թվականի նոյեմբերի 9-ի եռակողմ համաձայնագրով, և՛ «Զանգեզուրի միջանցքը վերջնականապես բացելու Ադրբեջանի նախագահ Իլհամ Ալիևի կատեգորիկ պահանջը»։
Նախապես համաձայնեցված լուծման փոխարեն Փաշինյանն առաջարկել է իր նախագիծը՝ «Խաղաղության խաչմերուկը», եզրափակել էր հաղորդավարը։
ԲՏԱ նախարար Մխիթար Հայրապետյանը հայտարարել էր, որ Կիսելյովի հաղորդումը Հայաստանում կարող է արգելափակվել։ Հայրապետյանը հայտնել էր, որ Հայաստանը 2025 թվականի հունվարին կրկին առաջարկներ կներկայացնի Ռուսաստանին՝ հանրային մուլտիպլեքսում ռուսական հեռուստաալիքների հեռարձակման վերաբերյալ, իսկ հոկտեմբերին ներկայացված առաջարկները անպատասխան են մնացել։
2024 թվականի դեկտեմբերի 17-ին «Փաստ» օրաթերթը գրել էր, որ իշխանությունները Հայաստանում ռուսական հեռուստաալիքներն ամբողջությամբ եթերազրկելու վերջնական որոշում ունեն։ Նույն օրն Armenia Today-ին ԲՏԱ նախարարությունից հայտնել էին, որ այդ պահին նշված թեմայով մեկնաբանություն չունեն։
Նույն տարվա ապրիլի 15-ին ԲՏԱ նախարարը մեկնաբանել էր ՀՀ-ում ռուսական հեռուստաալիքների հեռարձակման հնարավոր արգելքը։ Նա վստահեցրել էր, որ Հայաստանի նպատակը ոչ թե ռուսական հեռուստաալիքները փակելն է, այլ Երևանի և Մոսկվայի միջև զանգվածային հաղորդակցության ոլորտում համագործակցության միջկառավարական համաձայնագիրը վերանայելը։
2024-ի ապրիլի 10-ին Հայրապետյանը չէր բացառել, որ Հայաստանը կարող է միակողմանի խզել ՀՀ և ՌԴ կառավարությունների միջև ստորագրված «Զանգվածային հեռահաղորդակցության ոլորտում համագործակցության մասին» միջպետական համաձայնագիրը: Մարտի 30-ին «Հայաստանի հեռուստատեսային և ռադիոհաղորդիչ ցանցը» (ՀՀՌՑ) հայտնել էր լրագրող Վլադիմիր Սոլովյովի հեղինակած հաղորդումների հեռարձակումն արգելափակելու մասին։
