Մարդու իրավունքների պաշտպանի գրասենյակը ուսումնասիրություն է սկսել «Բարգավաճ Հայաստան» կուսակցության առաջնորդ Գագիկ Ծառուկյանի ձերբակալման ժամանակ ֆիզիկական ուժի և ձեռնաշղթայի կիրառման իրավաչափության հարցով, հայտնել է ՄԻՊ Անահիտ Մանասյանը։
ՄԻՊ աշխատակազմից հայտնել են, որ ուսումնասիրությունն սկսվել է տարածված տեսանյութի հիման վրա, որտեղ երևում է Ծառուկյանին իր բնակարանում գետնին գցելով ձերբակալելու պահը։
ՄԻՊ-ի գնահատմամբ՝ տեսանյութը հարցեր է առաջացնում՝ արդյոք ֆիզիկական ուժի և ձեռնաշղթայի կիրառման ժամանակ պահպանվե՞լ են անհրաժեշտության ու համաչափության իրավական չափանիշները։
Նշվում է նաև, որ հուլիսի 8-ին ՄԻՊ ներկայացուցիչներն այցելել են «Երևան-Կենտրոն» քրեակատարողական հիմնարկ, առանձնազրույց ունեցել Ծառուկյանի հետ, ուսումնասիրել նրա առողջական վիճակը, պահման պայմաններն ու իրավունքների ապահովմանն առնչվող հարցերը։
Պաշտպանի աշխատակազմը նաև ուսումնասիրում է փաստաբաններին խուզարկություններին մասնակցելու թույլտվություն չտրամադրելու վերաբերյալ ահազանգերը։
ՀՀ վարչապետ Նիկոլ Փաշինյանի և Ծառուկյանի միջև հեռակա բանավեճ էր սկսվել դեռ նախընտրական փուլում։ Փաշինյանը հայտարարել էր, որ «միլիարդատեր» քաղաքական գործիչները պետք է սնանկանան՝ նկատի ունենալով նաև Ծառուկյանին։ Փաշինյանը հայտարարել էր նաև ԲՀԿ առաջնորդի հետ կապվող «Արարատցեմենտ» ընկերությունը պետության վերահսկողության տակ վերցնելու մասին, ինչից հետո ընկերությանն առնչվող վարույթներ էին նախաձեռնվել։
Ծառուկյանը ներգրավված է առանձնապես խոշոր չափերով հարկերից խուսափելու վարույթում, ինչի պատճառով արգելվել է նաև ելքը ՀՀ-ից։ Հուլիսի 6-ի առավոտյան Ծառուկյանի բնակարանում, ինչպես նաև ավելի քան 70 ընկերությունում խուզարկություններից հետո նրան ձերբակալել էին, հուլիսի 7-ին՝ կալանավորել։
Ծառուկյանին մեղադրում են նաև ապօրինի որսի մեջ, և այդ վարույթի շրջանակում նրա առաձնատնից առգրավվել էին կենդանիների խրտվիլակներ, ինչպես նաև 3 առյուծ և 1 վագր, առյուծներից մեկը քնեցումից չէր արթնացել։ Ծառուկյանն իրեն առաջադրված մեղադրանքներն անվանել էր «սուտ» և «փուչիկ»։
