Հայաստանում Իրանի դեսպան Խալիլ Շիրղոլամին հայտարարել է, որ Թեհրանը հույս ունի «Բարգավաճ Հայաստան» կուսակցության առաջնորդ Գագիկ Ծառուկյանի և Իրանի քաղաքացիների միջև ծագած ու քրեական գործի հիմք դարձած վեճի արդար ու խաղաղ կարգավորմանժ։ Նա այս մասին խոսել է հրավիրած մամուլի ասուլիսի ժամանակ։
Դեսպանը նշել է, որ համատեղ աշխատանքի ընթացքում որոշակի առևտրային տնտեսական տարաձայնություններ են առաջացել կողմերի միջև և նրանք դադարեցրել են իրենց համագործակցությունը։ Նրա պոսքով՝ այդ տարածքը, որը նախատեսված էր առևտրի կենտրոնի կառուցման համար, պատկանում էր Ծառուկյանին։ Ընթացքում համագործակցություն է ձևավորվել և կենտրոնի բացման պաշտոնական արարողություն է տեղի ունեցել։
«Իհարկե, երկու կողմից էլ փոխադարձ մեղադրանքներ էին հնչում մյուս կողմի նկատմամբ, առ այն, որ մյուս կողմը հափշտակել է իր գումարը։ Բացի այս պրոյեկտից, նաև այլ պրոյեկտի շրջանակներում էին աշխատում իրար հետ և համագործակցում, սակայն այս տարաձայնությունների հետևանքով խնդիրներ առաջացան նաև այլ այլ պրոյեկտներում»,- պատմել է դեսպանը։
Դիվանագետի փոխանցմամբ՝ դեսպանությունը պատրաստ է աջակցել երկխոսությանն ու խաղաղ կարգավորմանը, որպեսզի տնտեսական այս խնդիրը «սև բծեր» չթողնի երկու երկրների հարաբերությունների վրա։
Վարչապետ Նիկոլ Փաշինյանի և Ծառուկյանի միջև հեռակա բանավեճ էր սկսվել դեռ նախընտրական փուլում։ Փաշինյանը հայտարարել էր, որ «միլիարդատեր» քաղաքական գործիչները պետք է սնանկանան՝ նկատի ունենալով նաև Ծառուկյանին։ Փաշինյանը հայտարարել էր նաև ԲՀԿ առաջնորդի հետ կապվող «Արարատցեմենտ» ընկերությունը պետության վերահսկողության տակ վերցնելու մասին, ինչից հետո ընկերությանն առնչվող վարույթներ էին նախաձեռնվել։
Ծառուկյանը ներգրավված է առանձնապես խոշոր չափերով հարկերից խուսափելու վարույթում, ինչի պատճառով արգելվել է նաև ելքը ՀՀ-ից։ Հուլիսի 6-ի առավոտյան Ծառուկյանի բնակարանում, ինչպես նաև ավելի քան 70 ընկերությունում խուզարկություններից հետո նրան ձերբակալել էին, հուլիսի 7-ին նրան կալանավորել էին։
Ծառուկյանին մեղադրում են նաև ապօրինի որսի մեջ, և այդ վարույթի շրջանակում նրա առաձնատնից առգրավվել էին կենդանիների խրտվիլակներ, ինչպես նաև 3 առյուծ և 1 վագր, առյուծներից մեկը քնեցումից չէր արթնացել։ Ծառուկյանն իրեն առաջադրված մեղադրանքներն անվանել է «սուտ» և «փուչիկ»։
