Ցեղասպանության թանգարան-ինստիտուտի նախկին տնօրեն, պատմական գիտությունների դոկտոր Հայկ Դեմոյանը մանրամասներ է հայտնել իր բնակարանում տեղի ունեցած խուզարկության մասին։
Նրա խոսքով՝ իր երևանյան բնակարանում և Գյումրիում տեղի են ունեցել զուգահեռ խուզարկություններ։
«Խուզարկության արդյունքում քննչական մարմիններն այսօր առգրավել են լատունից հուշամեդալ, որը թողարկվել էր 2001 թվականին` Հայաստանում քրիստոնեության 1700 ամյակի առիթով: Այն 3000 դրամով ձեռք էի բերել անցած տարվա հոկտեմբերին՝ Վերնիսաժից»,- նշել է Դեմոյանը:
Նա հիշեցրել է, որ 2021 թվականի հունիսի 7-ին Հայոց ցեղասպանության թանգարան-ինստիտուտի տնօրեն Հարություն Մարությանի հաղորդման հիման վրա հարուցվել էր քրեական գործ: Նրա խոսքով՝ գործը վարող ավագ քննիչ Լուսինե Հայկյանին հայտնել է, որ ներկայացված իբր հափշտակված իրերի ցանկը կեղծ է, և Մարությանի կողմից նախաքննությանը ներկայացվել են կեղծ տվյալներ, որը քրեորեն պատժելի արարք է:
Դեմոյանը շեշտել է, որ համակ ուշադրությամբ հետևելու է, որպեսզի հարուցված քրեական գործի շրջանակում համանման խուզարկություններ կատարվեն նաև Արարատ Միրզոյանի, Վլադիմիր Վարդանյանի, Արայիկ Հարությունյանի, Հովհաննես Հովհաննիսյանի, Հարություն Մարությանի և Սուրեն Մանուկյանի բնակարաններում: Դեմոյանի խոսքով՝ ցուցմունք է տվել գործով՝ Միրզոյանի և Վարդանյանի կողմից թանգարանից գրքերի հնարավոր գողության վերաբերյալ, իսկ Հարությունյանը, Հովհաննիսյանը և Մանուկյանը կասկածվում են 2017-18 թվականներին թանգարան-ինստիտուտի տնօրենի գրասենյակ ներխուժելու և գույքային վնաս պատճառելու մեջ:
Այսօր ավելի վաղ Դեմոյանը հայտնել էր իր բնակարանի խուզարկության մասին։ 2025 թվականի նոյեմբերին Արտաքին գործերի նախարար Արարատ Միրզոյանը դատական հայց էր ներկայացրել Դեմոյանի դեմ՝ գրքերի անհետացման գործի վերաբերյալ նրա արած հայտարարությունների համար: Հայցը վերաբերում է հարցազրույցում Դեմոյանի արած հայտարարություններին, որոնցում նա թվարկել է թանգարանից գրքերի անհետացմանը ենթադրաբար ներգրավված անձանց: Գողությունը տեղի էր ունեցել 2004 թվականին. վերանորոգման աշխատանքների ժամանակ անհետացել էր 19-ն արժեքավոր գիրք: Այդ ժամանակ քրեական գործ չէր հարուցվել:
2007 թվականին Դեմոյանը հետաքննություն էր սկսել, որից հետո, ըստ նրա, հարցաքննվել էին Միրզոյանը և «Քաղաքացիական պայմանագիր» կուսակցության պատգամավոր Վարդանյանը: 2026 թվականի հունվարին վարչապետի աշխատակազմի ղեկավար Արայիկ Հարությունյանը հայտարարել էր Դեմոյանին դատի տալու մտադրության մասին։
