Գրիպի դեմ պատվաստանյութը նպաստել է թոքաբորբի դեպքերի թվի նվազմանը և բարդությունների կանխարգելմանը, Armenia Today-ին հայտնել է Ինֆեկցիոն հիվանդությունների ազգային կենտրոնի բժիշկ-վարակաբան Հայկ Հարությունյանը:
Նա նշել է, որ Հայաստանում դեռևս գրանցվում են կորոնավիրուսի եզակի դեպքեր, սակայն դրանք սեզոնային շնչառական հիվանդությունների շարքում են և չեն պահանջում որևէ առանձնահատուկ մոտեցում կամ համաճարակաբանական միջոցառում:
«Վաղ հայտնաբերված դեպքերը կանխում են ծանր ընթացքը։ Դեպքերի թիվը կարող է աճել, բայց ունենում ենք բարդացած, հոսպիտալացված, ծանր, մահացու դեպքերի նվազում»,- նշել է մասնագետը:
Հարությունյանն ընդգծել է, որ վարակիչ հիվանդությունների դեպքում կարևոր է ոչ միայն հիվանդի առողջությունը, այլև շրջապատի մարդկանց անվտանգությունը: Նա հավելել է, որ կանխարգելումը մեծապես կախված է անհատի պատասխանատվությունից, հատկապես վաղ հայտնաբերման դեպքում:
Հարությունյանի գնահատմամբ՝ Հայաստանում ներկայումս բռնկումներ կամ դեպքերի աճ չեն նկատվում: Նա նշել է, որ հոսպիտալացումների մեծ մասը կապված է հիմքում ընկած հիվանդությունների սրացման հետ, մինչդեռ վիրուսի պատճառով առաջացած ծանր ձևերը հազվադեպ են:
Բժշկի խոսքով՝ վարակները միշտ էլ կլինեն, քանի որ վիրուսները կենդանի օրգանիզմներ են, որոնք ձգտում են պահպանել իրենց կենսաբանական շղթան:
Հարությունյանը շեշտել է, որ վաղ ախտորոշումը մնում է արդյունավետ կանխարգելման հիմնական գործիքը, քանի որ այն օգնում է կանխել ծանր հիվանդությունները և նվազեցնել բարդությունների ու հոսպիտալացումների քանակը:
Մասնագետը բացատրել է, որ սեզոնային հիվանդությունների աճը պայմանավորված չէ միայն ցուրտ եղանակով: Նրա կարծիքով՝ հիմնական պատճառը փակ տարածքներում կուտակումներն ու անբավարար օդափոխությունն են, ինչը նպաստում է հարուցիչների տարածմանը: Բժիշկը կրկնել է, որ հիգիենայի հիմնական կանոնների պահպանումը, սենյակների պարբերաբար օդափոխությունը, առողջ սննդակարգը և իմունային համակարգի ամրապնդումը մնում են կանխարգելիչ հիմնական միջոցառումներ:
Հարությունյանը վստահություն է հայտնել, որ պատվաստանյութերը, մասնավորապես, գրիպի դեմ, բազմիցս ապացուցել են իրենց արդյունավետությունը: Պատվաստումների շնորհիվ վերջին տարիներին կանխվել են թոքաբորբի զանգվածային բռնկումները և բարդացումները: Միևնույն ժամանակ, մասնագետը նշել է, որ յուրաքանչյուր պատվաստանյութ ունի իր սահմանափակումները: Նրա խոսքով՝ գրիպի վիրուսն արագ մուտացվում է, ուստի պատվաստանյութի ազդեցությունը կարճատև է և նախատեսված է մեկ սեզոնի համար: Հետևաբար, նա կարծում է, որ պատվաստումն անհրաժեշտ է ամեն տարի՝ ձևափոխված վիրուսի դեմ:
Հարությունյանը պարզաբանել է, որ նախ պետք է պատվաստվեն 5 տարեկանից փոքր երեխաները, 60 տարեկանից բարձր անձինք, մանկապարտեզների, դպրոցների և այլ փակ կոլեկտիվների աշխատակիցները: Բժիշկը շեշտել է պատասխանատվության կարևորությունը ոչ միայն սեփական առողջության, այլև ուրիշների առողջության համար, քանի որ պատվաստումը նվազեցնում է ինֆեկցիաների տարածման հավանականությունը: Նա հավելել է, որ գրիպի դեմ պատվաստումն արդյունավետ է թոքաբորբի և հիվանդության տեղայնացված բռնկումների կանխարգելման գործում, այդ թվում՝ փակ կոլեկտիվներում:
«Մեկ-մեկ, որ ասում են՝ «բժիշկ ջան, մի լավ հակաբիոտիկ կամ հակաբորբոքային դեղ ասա», տվյալ գաղափարը պետք է իսպառ հանել մեր մտածելակերպից։ Լավ դեղորայքն այն է, որը նշանակված է ճիշտ, տեղին և ազդում է տվյալ հարուցչի վրա»,- ընդգծել է բժիշկը:
Վարակաբանի խոսքով՝ բնակչության մոտավորապես 95%-ի պատվաստման ծածկույթի դեպքում վարակը կարող է լիովին վերացվել: Եթե ծածկույթի մակարդակը ցածր է, վիրուսը շարունակում է շրջանառվել և պահպանվել բնակչության մեջ:
Մանրամասները՝ տեսանյութում:
