Երևանի Նոր Նորք վարչական շրջանի Գայի պողոտա 45/6 հասցեի բնակիչները բողոքի ակցիա են իրականացրել քաղաքապետարանի շենքի մոտ՝ պահանջելով թույլ չտալ իրենց շենքի հարակից այգու և խաղահրապարակի տեղում 18 հարկանի շենքի կառուցումը։
Հարցն ընդգրկված էր Երևանի ավագանու սեպտեմբերի 9-ի օրակարգում, սակայն «Հանրապետություն» խմբակցության ղեկավար Անի Խաչատրյանն առաջարկել էր հանել այն օրակարգից, ինչն ընդունվել էր։ «Մայր Հայաստան» խմբակցության ղեկավար Մանուկ Սուքիասյանն առաջարկել էր հարցը թողնել օրակարգում և նշել, որ, ընդհակառակը, այն պետք է դարձնել զեկուցվող, սակայն քաղաքապետ Տիգրան Ավինյանն առաջարկել էր մտքերի փոխանակության ժամանակ անդրադառնալ դրան։
Խաչատրյանը դուրս էր եկել ցուցարարների մոտ և հայտարարել, որ իր առաջարկով՝ կառուցապատողի կողմից այս տարածքում աշխատանքներ սկսելու նախնական համաձայնության հարցը հանվել է օրակարգից, սակայն բնակիչները շարունակում են անհանգստանալ, քանի որ հարցն օրակարգից հանելը չի երաշխավորում իրենց օգտին որոշում կայացնել։
«Օրենքով, եթե հարցը հանվում է օրակարգից, ավագանին չի քվեարկում «դեմ» կամ «կողմ», անկախ ամեն ինչից՝ նախագիծը դրական եզրակացություն է ստանում», - ասել է ակտիվիստ Արթուր Չախոյանը։
Խաղահրապարակի կորուստը և անվտանգության հետ կապված խնդիրները. ինչի՞ շուրջ են բողոքում բնակիչները
Նիստի հաջորդ օրը՝ սեպտեմբերի 10-ին, Armenia Today-ի նկարահանող խումբը այցելեց շենքերի բակ և զրուցեց բնակիչների հետ։
Նրանք կարծում են, որ ոչ միայն երեխաները կզրկվեն այգուց և խաղահրապարակից, այլև անվտանգության հարց կառաջանա, քանի որ խիտ կառուցապատման պատճառով հրշեջ մեքենաներն անգամ չեն կարողանա մոտենալ իրենց շենքերին։
Բնակիչների խոսքով՝ նոր, արդեն 8-րդ սեփականատերը մտադրվել է բազմահարկ շենքը կառուցել մոտ 5000 քառակուսի մետր տարածքից 2200 քառակուսի մետրի կենտրոնում։
Շենքի ակտիվիստներն ու բնակիչները պնդում են, որ քաղաքային իշխանությունների կողմից նախագծի հաստատումն իրենց սահմանադրական իրավունքների ակնհայտ խախտում է։ Նրանք հիշեցրել են, որ ՀՀ հողային օրենսգրքի 60-րդ հոդվածի համաձայն՝ խաղահրապարակի տարածքը համարվում է օտարվող հող, և դրա վաճառքն արգելվում է օրենքով։
Շենքի բնակչուհի Արմինե Փարսադանյանը Armenia Today-ին պատմեց՝ բակերում երեխաների համար խաղալու, շարժվելու տեղ չկա։
«Հասկանալի է, որ սեփականատերն առել է, նա Սամվել Սահակյանն է, մենք նույնիսկ իրեն տեսել ենք։ Քաղաքապետարանը կարող է 2200 քառակուսի/մետրը մի ուրիշ տեղ իրեն տրամադրել, սա մնա ժողովրդին՝ հանրային տարածք։ Խնդրում ենք պարոն Տիգրան Ավինյանին ու Նիկոլ Փաշինյանին՝ գոնե մի քիչ մտածել ժողովրդի մասին, չէ՞ որ ժողովրդական երկիր է»,- նշել է նա։
Շենքի բնակիչ Հերբերտ Հովակիմյանն Armenia Today-ին ասաց, որ պատրաստ է իր կյանքը զոհել, միայն թե քաղաքային իշխանությունները հարակից շենքերի երեխաներից չխլեն իրենց միակ խաղավայրը։
«Իմ հասակակիցները բոլորը մահացել են, ես եմ մնացել հասակով, և ժամանակի ընթացքում բոլորն էլ պայքարել են, որ այս տարածքը հանկարծ շինարարության հրապարակ չլինի։
Եթե այստեղ հանկարծ որևէ տեխնիկա լինի, ես այդ մեքենայի տակ եմ ինձ գցելու՝ որպես բողոքի ցույց։ Ես կմահանամ, բայց ինձ թվում է՝ դա ինչ-որ մի կերպ կզգաստացնի այդ կասկածելի ղեկավարներին»,- ասաց Հովակիմյանը։
Հարցը հասել է ավագանուն՝ չնայած բացասական եզրակացություններին
Բնակիչներն ամիսներ շարունակ ակտիվորեն մասնակցել են օրենքով նախատեսված հանրային չորս քննարկուման, որոնցից երեքն ավարտվել է թաղապետարանի բացասական կարծիքներով, իսկ ավագանին հրաժարվել է շինարարության թույլտվություն տրամադրել։
Սակայն սեպտեմբերի 9-ի Երևանի ավագանու օրակարգում կրկին ներառվել էր թույլտվություն տրամադրելու հարցը։ Եվ սա այն դեպքում, երբ խորհուրդը նախկինում երեք անգամ մերժել էր այն։
Տարածքում գտնվող մեծ ու կենսունակ առողջ ծառերը ցանկանում են կտրել, հեռացնել, որ շենքեր կառուցեն, Armenia Today-ին հայտնեց ակտիվիստ Արթուր Չախոյանը։ Նրա խոսքով՝ դա տանելու է բնապահպանական աղետի։
«18 հարկանի շենքերը կառուցելուց հարակից շենքերի արևը մարելու է։ Դա անընդունելի է։ 2023 թվականի քաղաքապետի քարոզարշավի ընթացքում Ավինյանը խոստացել է, որ այս տարածքում նոր խաղահրապարակ կկառուցվի, բայց տեսնում ենք, որ ոչինչ էլ չի կառուցում, այլ նոր խաղահապարակի փոխարեն ցանկանում է 18 հարկանի շենքեր կառուցել։ Մենք ձեռքերս ծալած չենք նստելու»,- շեշտեց Չախոյանը։
Բողոքի ակցիայի մասնակիցները պահանջել են հանդիպում քաղաքապետ Տիգրան Ավինյանի հետ, որը 2023 թվականի ավագանու ընտրությունների քարոզարշավի ժամանակ խոստացել էր, որ այդ վայրում նոր խաղահրապարակ կկառուցվի։
Ավինյանը, սակայն, դուրս չեկավ ցուցարարների մոտ։ Անի Խաչատյանի պնդմամբ՝ շինթույլտվությունը տրվել է ոչ թե Ավինյանի կողմից, այլ նրանից շատ առաջ՝ չհայտնելով մանրամասները։
Կարդացեք նաև՝
Եթե տեխնիկա գա՝ մեքենայի տակ եմ ինձ գցելու. Նոր Նորքի բնակիչները պահանջում են պահպանել խաղահրապարակը
