Հայ Առաքելական եկեղեցու Գերագույն հոգևոր խորհուրդն իրավապահներին հորդորել է կանխել ապօրինությունները և ապահովել Հովհաննավանքում սպասավորող քահանաների բնականոն ծառայությունն ու սրբավայրի հոգևոր-աղոթական մթնոլորտը, նշված է խորհրդի տարածած հայտարարության մեջ:
Խորհուրդն ուշադրություն է հրավիրել այն հանգամանքի վրա, որ Ամենայն Հայոց կաթողիկոս Գարեգին Բ-ի տնօրինությամբ, Մայր Աթոռ Սուրբ Էջմիածնի Պարգևների շնորհման և կարգապահական հարցերի հանձնախմբի եզրակացության հիման վրա, Արագածոտնի թեմի հոգևոր սպասավոր Տեր Արամ քահանա (Ստեփան՝ աշխարհիկ անվամբ-խմբ.) Ասատրյանը կարգալույծ է հռչակվել՝ «սպառած լինելով կանոնական դաշտ վերադառնալու իրեն ընձեռված ողջամիտ բոլոր հնարավորությունները»:
Մայր Աթոռն Ասատրյանին, ըստ եկեղեցու կանոնների, արգելել է կատարել եկեղեցական ծեսեր ու խորհրդակատարություններ, ազատել եկեղեցին և բանալիները հանձնել, ձեռնպահ մնալ ծեսերի, այդ թվում՝ Սուրբ պատարագի խորհրդի մատուցմանը որևէ կերպ խոչընդոտելուց, ինչը ոչ միայն կանոնական կոպտագույն խախտում է, այլև՝ քրեորեն պատժելի արարք։
Գերագույն հոգևոր խորհուրդը նշել է, որ Ասատրյանը, անտեսելով Մայր Աթոռի օրինական պահանջները, հրաժարվում է հանձնել եկեղեցու բանալիները և ազատել Հովհաննավանքի տարածքը։
«Ցավում ենք, որ Արամ քահանայի կարգազանց ընթացքի հետևանքով Մայր Աթոռի կողմից ձեռնարկված կարգապահական միջոցառումները և կայացված կարգալուծության որոշումն անհարկի շահարկում են իշխող քաղաքական ուժի ներկայացուցիչները։ Դատապարտելի է հատկապես վարչապետի աջակցությամբ Հովհաննավանքում պատարագի անվան ներքո միջոցառում կազմակերպելու Ասատրյանի հոգեկործան նախաձեռնությունը։ Սա իշխող քաղաքական ուժի ղեկավարի կողմից եկեղեցին պառակտելու հերթական փորձ է` հակաօրինական ու հակաեկեղեցական իր բոլոր դրսևորումներով»,- ասված է հայտարարության մեջ:
Թեպետ կարգալույծ լինելուն՝ Ասատրյանը հոկտեմբերի 21-ին հայտարարել էր, որ հոկտեմբերի 26-ին Հովհաննավանքում պատրաստվում է պատարագ մատուցել։ Նույն օրը ՀՀ վարչապետ Նիկոլ Փաշինյանը տեղեկացրել էր, որ մասնակցելու է պատարագին։ ԱԺ-ում էլ վերահաստատել էր դիրքորոշումը՝ նշելով, որ ոչ թե Ասատրյանն, այլ Գարեգին Բ-ն է «կարգալույծ»։
Հոկտեմբերի 23-ին Հովհաննավանքում Ասատրյանը մերժել էր եկեղեցու ծանուցումը և հայտարարել, որ քահանա է:
