ՀՀ Զինված ուժերի գլխավոր շտաբի մեծամասնությունը կատեգորիկ դեմ է շարքային զինծառայության ժամկետը 2-ից 1,5 տարի կրճատելու նախաձեռնությանը, գրել է «Հրապարակ»-ը՝ հղում անելով իր աղբյուրներին:
Փորձառու զինվորականներն, ըստ պարբերականի, անհիմն են համարում իշխանությունների փաստարկը, թե քաղաքական որոշում է կայացվել, պատերազմ էլ չի լինելու, ուստի սահմանների անվտանգության խնդրին նախկին չափանիշներով պետք չէ մոտենալ: Թերթի հաղորդմամբ՝ ԳՇ-ում կարծում են, որ խաղաղություն կարելի է հաստատել միայն ուժով, իսկ նախագծի տակ էլ հաշվարկ չեն տեսնում։
«Սակայն իշխանությունն անդրդվելի է` մասնագետների տեսակետներն արհամարհվում են, քանի որ հիմա ամեն ինչ ծառայեցվում է նախընտրական շահերին, իսկ գեներալիտետը ռիսկ չի անում բարձրաձայն ընդդիմանալ»,- նշել է թերթը։
Պաշտպանության նախարարությունը սեպտեմբերին օրինագիծ էր առաջարկել, որով նախատեսվում էր պարտադիր զինվորական ծառայության ժամկետը կրճատել մինչև 18 ամիս։ Հոկտեմբերի 21-ին ՀՀ վարչապետ Նիկոլ Փաշինյանը հայտնել էր, որ պարտադիր զինծառայության ժամկետի կրճատման մասին օրինագծի ընդունման դեպքում այն ուժի մեջ կմտնի 2026 թվականի հունվարի 1-ից։
Հոկտեմբերի 25-ին ՀՀ պաշտպանության նախարար Սուրեն Պապիկյանը խոսել էր սահմանային իրավիճակի, բանակում մահացությունների թվի նվազման, զենքի ձեռքբերման, ինչպես նաև զորակոչի կրճատման ծրագրերի մասին։ Նախարարի խոսքով՝ ցանկալի կլինի, որ բանակը գրավիչ լինի հասարակության համար և չընկալվի որպես կալանավայր։
