Ղազախստանի «Ակորդա» նստավայրում տեղի է ունեցել ՀՀ վարչապետ Նիկոլ Փաշինյանի և Ղազախստանի նախագահ Կասիմ-Ժոմարտ Տոկաևի հանդիպումը, վերջինս պարգևատրել է Փաշինյանին Ղազախստանի պետական բարձրագույն պարգևով՝ «Ոսկե արծիվ» շքանշանով։ Կողմերը քննարկել են հարաբերությունների զարգացումը մինչև ռազմավարական գործընկերություն, Երևան-Աստանա ուղիղ ավիաչվերթերի գործարկումը և այլ հարցեր:
Պատիվ ունեմ
Տոկաևը Փաշինյանին պարգևատրել է «Ոսկե արծիվ» շքանշանով (ղազախերեն՝ Алтын Қыран)։ Դա Ղազախստանի բարձրագույն պարգևն է։ Այս շքանշանը շնորհվում է այն քաղաքացիներին, որոնք Ղազախստանին մատուցել են բացառիկ պետական ծառայություն։
Ռազմավարական գործընկերություն
Հայաստանն ու Ղազախստանը համագործակցությունը կբարձրացնեն ռազմավարական գործընկերության մակարդակի, հայտարարել է Տոկաևը։ Նա ընդգծել է, որ այս այցն առանձնահատուկ նշանակություն ունի:
«Մեր համագործակցությունը թե՛ առևտրատնտեսական, թե՛ մշակութային, թե՛ կրթական ոլորտներում շարունակաբար զարգանում է: Ցանկանում եմ ընդգծել, որ միջպետական հարաբերություններն առանձնահատուկ են, ունենք մեծ հնարավորություններ բազմակողմանիորեն զարգացնել համագործակցությունը: Այսօր կստորագրենք պատմական փաստաթղթեր, որպեսզի երկու երկրի հարաբերությունները դարձնենք ռազմավարական»,- ասել է նա։
Փաշինյանն, իր հերթին, շեշտել է, որ հայ-ղազախական հարաբերություններում այս նոր դարաշրջանը բացվել է անցյալ տարի Տոկաևի՝ Հայաստան կատարած պաշտոնական այցի շնորհիվ, որի արդյունքում «ստորագրել են մի շարք կարևորագույն համաձայնագրեր», որոնց մի մասն արդեն իրականացվել է, մնացածն իրականացման փուլում է:
«Այսօր Աստանայում փողոցներից մեկն անվանակոչվեց հայոց գրերի հեղինակի՝ Սուրբ Մեսրոպ Մաշտոցի անունով: Սա նույնպես ընկալում ենք որպես հարգանքի դրսևորում հայ ժողովրդի և Հայաստանի նկատմամբ»,- ասել է Փաշինյանը:
Երևան-Աստանա ուղիղ ավիաչվերթեր
Համատեղ հայտարարության ժամանակ Տոկաևն ասել է, որ Ղազախստանն ու Հայաստանը բոլոր անհրաժեշտ քայլերը ձեռնարկելու են երկրների միջև ուղիղ չվերթեր հաստատելու ուղղությամբ։ Նրա խոսքով` այսօր Հայաստանը դարձել է ղազախ ժողովրդի համար շատ սիրելի զբոսաշրջային ուղղություն։
Փաշինյանի խոսքով` տարածաշրջանում տեղի ունեցող փոփոխությունները նոր հնարավորություններ են բացում տնտեսական հարաբերությունների հետագա խորացման համար, բացվում են տրանսպորտային նոր հնարավորություններ, որոնք պետք է լրջորեն ուսումնասիրել:
Աստանան հետաքրքրված է Թրամփի երթուղով (TRIPP)
Տոկաևը հայտարարել է, որ Աստանան հետաքրքրված է «Միջազգային խաղաղության և բարգավաճման Թրամփի երթուղով» և կարծում է, որ այն պետք է ինտեգրվի Հյուսիս-հարավ միջանցքի և Անդրկասպյան միջազգային տրանսպորտային երթուղու հետ։
«Հարավային Կովկասում ստեղծված աշխարհաքաղաքական նոր իրավիճակը բարենպաստ պայմաններ է ստեղծում երկկողմ և միջտարածաշրջանային կապերի ամրապնդման համար։ Ղազախստանն աջակցում է Հայաստանի «Խաղաղության խաչմերուկ» նախաձեռնությանը տրանսպորտի և տարանցման ոլորտում։ Հաստատում ենք նաև մեր հետաքրքրությունը «Միջազգային խաղաղության և բարգավաճման երթուղի» նախագծին մասնակցելու հարցում»,- ասել է Տոկաևը։
Նա նշել է, որ «ռազմավարական այս միջանցքներն Անդրկասպյան միջազգային տրանսպորտային երթուղու և Հյուսիս-հարավ միջանցքի հետ կապելը համապատասխանում է երկու երկրների շահերին»։
Կողմերը քննարկել են նաև առևտրատնտեսական, գործարար կապերի զարգացմանը, ենթակառուցվածքների, տրանսպորտի, գյուղատնտեսության, ավիահաղորդակցության, կրթության, մշակույթի ոլորտներում համագործակցության զարգացմանը վերաբերող հարցերի լայն շրջանակ:
Փաշինյանը նոյեմբերի 20-ին պաշտոնական այցով մեկնել էր Ղազախստան:
