Tashir Arena-ում հոկտեմբերի 21-ին կայացել է յուրօրինակ թատերական-կրկեսային Eternia շոուի բարեգործական նախապրեմիերային ցուցադրությունը, հայտնում է արենայի մամուլի ծառայությունը։
Ցուցադրությանը ներկա էր շուրջ 2000 հանդիսատես Հայաստանի տարբեր համայնքներից։ Առաջին հանդիսատեսներն էին բազմազավակ և Արցախից տեղահանված ընտանիքներ, վետերաններ, հաշմանդամություն ունեցող անձինք, ինչպես նաև բարեգործական հիմնադրամների շահառուներ։
Նախագծի հեղինակ և գաղափարական առաջնորդ Տաթևիկ Կարապետյանի խոսքով՝ այն պարզապես շոու չէ, այլ արվեստի միջոցով հնչող խոսք՝ ներքին ազատության և դժվարությունը հաղթահարելու կարողության մասին։
«Eternia-ն ստեղծել ենք որպես պատմություն, որը կարող է հուզել յուրաքանչյուրի սիրտը, ուժ տալ և հիշեցնել, որ նույնիսկ ամենադժվար պահին մեր ներսում ապրում է լույսը։ Հատկապես խորհրդանշական է, որ Tashir Arena-ի առաջին հանդիսատեսը նրանք են, ովքեր բոլորից լավ են հասկանում տոկունության և հույսի արժեքը»,- նշել է նա։
Eternia շոուն յուրօրինակ թատերական-կրկեսային ներկայացում է՝ ստեղծված հատուկ Tashir Arena-ի բեմի համար։ Այն պատմում է լույսի և խավարի հավերժ պայքարի, հավատի, հույսի, սիրո և մարդկային հոգու անսահման ուժի մասին, որն ունակ է հաղթահարելու ցանկացած փորձություն՝ իրականությունից այն կողմ տանող ճանապարհորդության պատմություն։
Փորձերն անցկացվել են շուրջ երկու տարի, իսկ շոուին մասնակցել է ավելի քան հարյուր արտիստ տարբեր երկրներից։
Երևանի ժամանակակից, բազմաֆունկցիոնալ մշակութային և ժամանցային կենտրոնը՝ Tashir Arena-ն, հոկտեմբերի 25-ին իր դռները կբացի հանդիսատեսի առջև։ Կցուցադրվի Eternia շոուն՝ չորս նովելայից բաղկացած պատմությունը։
Կարդացեք նաև`
Կրկեսը վերադառնում է. Tashir Group մշակութային նախագծի մեկնարկից առաջ Երևան են ժամանել կրկեսային արտիստները
«Երեխաները` երեխաների համար». Tashir Arena-ն բարեգործական երեկո է անցկացրել Սամվել Կարապետյանի նախաձեռնությամբ նրա 60-ամյակի առթիվ
Eternia-ն չորս նովելայից բաղկացած պատմություն է․ Բրյունը՝ Երևանի կրկեսի բացման ծրագրի մասին
