Գյումրիի քաղաքապետ Վարդան Ղուկասյանի և ձերբակալված մյուս պաշտոնատար անձանց պաշտոնավարումը կասեցվել է, հայտնել է Հակակոռուպցիոն կոմիտեն:
Կոմիտեն մանրամասնել է, որ ձերբակալված ութ անձից հինգի նկատմամբ կալանքը որպես խափանման միջոց կիրառելու վերաբերյալ միջնորդություններ են ներկայացվել դատարան, որոնցից համայնքի ղեկավարի նկատմամբ ընտրվել է կալանք, «կաշառք տվողներից մեկի նկատմամբ»՝ տնային կալանք, իսկ մյուսների մասով քննությունը շարունակվում է։
Հոկտեմբերի 20-ի առավոտյան իրավապահները քննչական գործողություններ էին սկսել Գյումրիի քաղաքապետարանում, այնուհետ համայնքի մի խումբ պաշտոնատար անձանց կողմից կաշառք ստանալու, վերջիններիս կաշառք տալու, ինչպես նաև նույն պաշտոնատար անձանց կողմից խմբի կազմում, նախնական համաձայնությամբ իրենց լիազորությունները չարաշահելու առերևույթ հանցագործությունների դեպքերի առթիվ նախաձեռնված քրեական վարույթով ձերբակալել համայնքի 8 պաշտոնյայի, այդ թվում՝ քաղաքապետին։ Կոմիտեն նաև ձայնագրություններ էր ներկայացրել:
Մեկնաբանելով մամուլում հայտնված պնդումները, թե Ղուկասյանի մասնակցությամբ հրապարակված ձայնագրությունները կեղծ են և չեն առնչվում նրա անձին, Հակակոռուպցիոն կոմիտեն շեշտել է, որ Գյումրիի համայնքապետն «իր ցուցմունքում ո՛չ հերքել, ո՛չ հաստատել է տվյալ բովանդակությամբ զրույց ունենալու հանգամանքը, ավելին՝ տվյալներ չի հայտնել ձայնագրություններում իր ձայնը կեղծված կամ փոխված լինելու մասին՝ խոսակցության վերաբերյալ ներկայացնելով իր սեփական պարզաբանումներն ու մեկնաբանությունները»։
Ըստ կոմիտեի՝ քրեական վարույթի շրջանակներում հարցաքննված մի շարք անձինք տվել են խոստովանական ցուցմունքներ՝ հաստատելով օպերատիվ-հետախուզական միջոցառումների արդյունքում ստացված փաստական տվյալների հավաստիությունը։
Ղուկասյանն այսօր առավոտյան կալանավորվել էր 2 ամսով: Նրա փաստաբանի փոխանցմամբ՝ Ղուկասյանին մեղադրում են կաշառք պահանջելու մեջ:
