Մերձավանում տեղի ունեցած սպանության դեպքի առթիվ ձերբակալվածի նկատմամբ հարուցվել է հանրային քրեական հետապնդում, դատարանը բավարարել է նրան կալանավորելու միջնորդությունը, հայտնում է Քննչական կոմիտեն։
ՔԿ-ից հավելել են, որ կալանավորվածի (Նարեկ Օհանյան-AT) նկատմամբ հարուցվել է հանրային քրեական հետապնդում՝ սպանությանն օժանդակելու հոդվածի հատկանիշներով:
Նախաքննական մարմնից նաև տեղեկացրել են, որ պարզվել և բացահայտվել է նաև առերևույթ սպանություն կատարած խմբի մյուս անդամի ինքնությունը, որը ձերբակալվել և ներկայացվել է նախաքննություն իրականացնող մարմին:
«Վերջինս տվել է ինքնախոստովանական ցուցմունքներ և մատնանշել հանցագործության գործիք հանդիսացող ինքնաձիգի գտնվելու վայրը: Քննիչի կողմից առգրավվել է նաև հանցագործության գործիք հանդիսացող ինքնաձիգը»,- հավելել են ՔԿ-ից։
Գերատեսչությունից տեղեկացրել են, որ երկրորդ անձի՝ ձերբակալվածի նկատմամբ քրհետապնդում է հարուցվել Քրեական օրենսգրքի 155-րդ հոդվածի 1-ին մասով (2 դրվագ սպանություն, առավելագույն պատիժն ազատազրկում՝ 15 տարի ժամկետով -խմբ․), 44-155-րդ 1-ին մասով (սպանության փորձը), 335-րդ հոդվածի 1-ին մասով (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը, առավելգույն պատիժն ազատազրկում՝ 5 տարի ժամկետով-խմբ․):
ՔԿ-ից մանրամասնել են, որ քննչական գործողությունների արդյունքում սպորտային պայուսակի մեջ հայտնաբերվել է նաև մարզասրահի այցեքարտ և պարզվել է, որ այցեքարտը պատկանում է սպանություն կատարած անձին:
Ավելի ուշ լրագրող Լիա Սարգսյանը, հղում անելով իր աղբյուրներին, գրել է, որ երկրորդ կասկածյալն «Օհանյանի ընկերն է՝ Մերձավանի 20-ամյա բնակիչ Գևորգ Հարությունյանը»։
«Իրավապահները հակված են այն վարկածին, որ Օհանյանն սպանությունն օժանդակողն է, իսկ Հարությունյանը կատարողը»,- հավելել է լրագրողը։
Սեպտեմբերի 24-ի գիշերը ՆԳՆ-ն հայտնել էր Փարաքարի համայնքապետ Վալոդյա Գրիգորյանի և քրեական ոստիկան Կարեն Աբրահամյանի սպանության, ինչպես նաև քաղաքացի Արծրուն Գալստյանի վիրավորվելու մասին։ ՔԿ-ն դեպքի առթիվ քրեական վարույթ էր նախաձեռնել, սեպտեմբերի 27-ին հայտնել էր գործը բացահայտելու մասին։ Ավելի ուշ հայտնի էր դարձել, որ ձերբակալվածն Օհանյանն է՝ փետրվարին Մերձավանում սպանված Գրիգոր Օհանյանի եղբայրը և Մերձավանի նախկին համանքապետ, «Քաղաքացիական պայմանագիր» կուսակցությունից Մհեր Ախտոյանի հորաքրոջ որդին։
2025-ի փետրվարին Օհանյանի եղբոր սպանության պատճառ դարձած կրակոցները հնչել էին Ախտոյանի տան մոտ։ Սպանության վարույթով տնային կալանքի տակ էր Փարաքարի սպանված համայնքապետի եղբայրը՝ Պայքար Գրիգորյանը։
