Բաքվում հայ գերիների նկատմամբ տեղի ունեցած «դատական» նիստի ժամանակ հայտարարվել է, որ նրանց «ցուցմունքների» ընթերցումն ավարտվել է, հայտնում են տեղական լրատվամիջոցները:
Նրանց տվյալներով՝ պատանդառված Արցախի նախկին նախագահներ Արկադի Ղուկասյանը, Բակո Սահակյանը և Արայիկ Հարությունյանը, խորհրդարանի նախկին նախագահ Դավիթ Իշխանյանը, Պաշտպանության բանակի նախկին փոխհրամանատար Դավիթ Մանուկյանը խնդրել են հաշվի առնել դատավարության ընթացքում իրենց տված ցուցմունքները: Արցախի պաշտպանության նախկին նախարար Լևոն Մնացականյանը նշել է, որ «համաձայն չէ ընթերցված ցուցմունքների որոշ հատվածների հետ»:
Արցախի նախկին արտգործնախարար Դավիթ Բաբայանը խնդրել է իրեն հնարավորություն տալ հաջորդ նիստում արտահայտել իր վերաբերմունքը «ցուցմունքների» նկատմամբ: Պնդվում է, որ գերիներ Մադաթ Բաբայանը և Գարիկ Մարտիրոսյանը լիովին հաստատել են «նախնական քննության» ընթացքում տված «ցուցմունքները», Լևոն Բալայանը, Մելիքսեթ Փաշայանը և Գուրգեն Ստեփանյանը՝ աննշան վերապահումներով, իսկ Գուրգեն Ստեփանյանը, Դավիթ Ալավերդյանը, Էրիկ Ղազարյանը և Վասիլի Բեգլարյանը՝ դատավարության ընթացքում տված «ցուցմունքները»։
Հաջորդ դատական նիստը նշանակված է սեպտեմբերի 8-ին։
Ադրբեջանում, պաշտոնական տվյալներով, 23 հայ գերի կա։ Հունվարի 17-ին սկսվել էին Արցախի ռազմաքաղաքական առաջնորդների դատավարությունները: Նրանք մեղադրվում են 2548 դրվագով։
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, Վարդանյանը, ԱԺ նախագահ Դավիթ Իշխանյանը, նախկին արտգործնախարար Դավիթ Բաբայանը, պաշտպանության նախկին նախարար Լևոն Մնացականյանը, Պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
