Պետական վերահսկողության ծառայության նախկին ղեկավար Ռոմանոս Պետրոսյանի ժամանակավոր կառավարման տակ անցած «Հայաստանի էլեկտրական ցանցեր» (ՀԷՑ) ՓԲԸ-ում նախատեսված են թոփ մենեջմենթում աուդիտ և կադրային հնարավոր փոփոխություններ։ Այդ մասին ընկերությունում իր աշխատանքի առաջին օրը լրագրողներին հայտնել է Հանրային ծառայությունները կարգավորող հանձնաժողովի կողմից ՀԷՑ-ի ժամանակավոր կառավարիչ նշանակված Պետրոսյանը: Նա նաև մեկնաբանել է էլեկտրաէներգիայի սակագնի հնարավոր բարձրացումը, որի մասին զգուշացրել էր «Տաշիր» ընկերությունների խմբի փոխնախագահ, ՀԷՑ-ի տնօրենների խորհրդի նախագահ Նարեկ Կարապետյանը:
Ավելի ուշ լրագրողների հետ զրույցում Պետրոսյանի հայտարարություններին անդրադարձել է ընկերության գլխավոր տնօրենի պաշտոնակատար Դավիթ Ղազինյանը: Ուղիղ միացումն՝ Armenia Today-ի։
Հնարավոր պաշտոնանկություններ ՀԷՑ-ում
Պետրոսյանը չի բացառել, որ աշխատանքից ազատվելու են ՀԷՑ-ի թոփ-մենեջմենթի ուղղության աշխատակիցները։ Նա հայտարարել է, որ Ղազինյանն իր պաշտոնին մնալու «ձև չունի», քանի որ ՀԷՑ-ը, նրա խոսքով, «այս վիճակին հասցնողներից մեկն է»։ Նա Ղազինյանին դիմում գրելու և հեռանալու կոչ է արել, նշելով՝ այլապես իր առաջին հրամանը լինելու է Ղազինյանին ազատելը՝ «վստահության կորստի հիմքով»։
«Ինչ վերաբերում է ազատումներին, ապա այս պահին մասսայական ազատումներ չեն նախատեսվում։ Ազատումներ կլինեն թոփ-մենեջմենթում, աշխատանքից կազատվեն մարդիկ, ովքեր ընկերությունը հասցրել են այն վիճակին, երբ պետությունն ստիպված է կանխարգելիչ միջոցներ ձեռնարկել։ Բայց մենք հարգում ենք էներգետիկ համակարգի վաստակաշատ մասնագետների գործը, ովքեր պետք է ապահովեն ՀԷՑ-ի անխաթար աշխատանքը։ Ես նրանց խնդրում ու հորդորում եմ իրենց աշխատանքն իրականացնել պատշաճ և որևէ կերպ տուրք չտալ սաբոտաժային հնարավոր ցուցումներին»,- նշել է Պետրոսյանը։
Ժամանակավոր կառավարիչը հայտարարել է նաև, որ մտադիր է այսօր ծանոթանալ ՀԷՑ-ի բոլոր աշխատակիցներին և նրանցից յուրաքանչյուրի պարտականություններին:
«Նախատեսում եմ նաև հանդիպում ընկերության տնօրենների խորհրդի նախագահ Նարեկ Կարապետյանի հետ»,- ընդգծել է պաշտոնյան։
Պետրոսյանը բացառել է մամուլում շրջանառվող տեղեկությունը, թե ՀԷՑ-ի 7000 աշխատակցի նկատմամբ 2026-ի ընտրություններին ընդառաջ վերահսկողություն սահմանելու նպատակ ունեն։
«Այդ 7000 աշխատակիցը Հայաստանի քաղաքացի է, որոնք արդեն յոթ տարի շարունակ համոզվել են, որ իրենց քվեն անբեկանելի է, նրանց ոչ ոք չի կարող համոզել։ Ցանկացած քաղաքացի իր կամարտահայտությունն իրականացնում է քվեախցում՝ առանց որևէ վերահսկողության և ուղորդման»,- նշել է Պետրոսյանը։
«Վստահության կորստի հիմքով» իրեն աշխատանքից ազատելու հնարավորությունը մեկնաբանելով՝ Ղազինյանը հակադարձել է Պետրոսյանին։
«Իսկ ո՞վ ասաց, որ ես իրեն վստահում եմ։ Անձամբ իրեն ու իրենց իշխանությանը չեմ վստահում»,- ընդգծել է Ղազինյանը։
Նա տեղեկացրել է, որ աշխատանքից ազատման դիմում չի գրել ու չի պատրաստվում հետևել Պետրոսյանի կոչին։ Միևնույն ժամանակ՝ չի բացառել, որ «բեսպրեդելի» միջոցով կարող են հասնել իր պաշտոնանկությանը, ավելին՝ իր դեմ նույնպես շինծու գործընթաց սկսեն։ Ղազինյանն «անբարոյականություն» է անվանել առանց հիմքի սաբոտաժի հնարավորության վերաբերյալ Պետրոսյանի հայտարարությունը։
Աուդիտ՝ ՀԷՑ-ում
Պետրոսյանը տեղեկացրել է ընկերության աուդիտ անցկացնելու ծրագրերի մասին և էներգետիկայի ոլորտի մասնագետներին, տնտեսագետներին առաջարկել է մասնակցել ՀԷՑ-ի կարիքներին առնչվող մրցույթներին։ Ըստ նրա՝ ընկերության ղեկավար կազմի հայտարարությունները հակասում են իրենց իսկ աուդիտի տվյալներին, որն իրականացրել էր KPMG-ն՝ միջազգային աուդիտ-խորհրդատվական կորպորացիան։
Ղազինյանը մեկնաբանել է հնարավոր խախտումների մասին պնդումներն ու շեշտել, որ իր պաշտոնավարման ընթացքում որևէ անօրինական գործարք չի կատարել:
«Որպես իրացման տնօրեն՝ անընդհատ իմ աշխատակիցների հետ չարաշահումներ եմ բացահայտել։ Արդեն կարող եք նոր կառավարչին դիմել այն հարցով, թե վերջին 10 տարիների ընթացքում որքա՞ն նյութական պատասխանատու է ազատվել աշխատակից։ Առնվազն 10 տարվա ընթացքում իմ պատասխանատվության գոտում չարաշահումները կանխվել են, ինչի վկայությունն էլեկտրաէներգիայի կորուստներն են, որոնք 13%-ից դարձել են 6,5%»,- նշել Ղազինյանը։
Էլեկտրաէներգիայի սակագնի հնարավոր բարձրացումը
Անդրադառնալով սակագնի հնարավոր փոփոխությանը՝ Պետրոսյանը հստակ չի պատասխանել հարցին։ Նա ո՛չ հաստատել, ո՛չ հերքել է գների հնարավոր բարձրացումը, ինչի մասին խոսել էր Նարեկ Կարապետյանը։ Ավելի վաղ ՀԷՑ-ի սեփականատեր, գործարար Սամվել Կարապետյանը, որը երկու ամսով կալանավորվել էր եկեղեցու դեմ արշավը քննադատելուց հետո, հայտարարել էր, որ էլեկտրաէներգիայի սակագինը 10 տարի չի բարձրանալու: Պետրոսյանը, մեկնաբանելով այդ մասին հարցերը, նշել է, որ չի կարող երաշխավորել գների կայունություն:
«Ինչպե՞ս կարող է հարգարժան սեփականատերը 10 տարվա կանխատեսում անել, եթե մենք չգիտենք, թե վաղն ինչ է լինելու աշխարհում, էներգետիկ համակարգում, տարածաշրջանում»,- պատճառաբանել է Պետրոսյանը:
Միաժամանակ, նա խոստացել է, որ սակագինը բխելու է «օբյեկտիվ, իրական ցուցանիշներից», հաշվարկները կատարվելու են «ըստ օրենքի՝ բացառելով մեքենայությունները, հովանավորչությունները, կոռուպցիոն որոշումները»։
«Սակագնի հարցը բացառապես Հանրային ծառայությունները կարգավորող հանձնաժողովի որոշման տիրույթում է։ Բայց որպես ժամանակավոր կառավարիչ՝ հարուցված վարույթի շրջանակներում վեր եմ հանելու բոլոր այն գործոնները, ծախսերը, որոնց հիման վրա ՀԾԿՀ-ն որոշումներ կկայացնի ու կհրապարակի։ Չեմ կարող երաշխավորել, թե սակագինը որ ուղղությամբ կգնա, բայց այն բխելու է օբյեկտիվ, իրական այն ցուցանիշներից, որոնք տեսնելու ենք ՀԷՑ-ի գործունեության մեջ։ Հաշվի են առնվելու նաև տնտեսվարողի շահերը՝ իր եկամտաբերության ընդունելի չափերը՝ համաձայնեցված նաև ոլորտը կարգավորող հանձնաժողովի հետ»,- շեշտել է նա։
Ղազինյանը Պետրոսյանի խոսքերը մանիպուլյատիվ է որակել՝ ընդգծելով, որ նա չի կարողացել ֆիքսել, թե սակագինն առնվազն երկու տարի չի բարձրանալու։
«Հիմա չեմ ուզում կոնկրետ թիվ ասել, բայց գրեթե պետության բյուջեի չափ օրինական ֆինանսական միջոցներ ունեցող մարդուն ասում են՝ ինչպե՞ս կարող է երաշխավորել՝ կբարձրանա՞, թե՞ ոչ»,- հավելել է Ղազինյանը։
Քննչական կոմիտեն հուլիսի 4-ին Armenia Today-ին տեղեկացրել էր, որ ընկերության գրասենյակում կատարված խուզարկություններից հետո հարուցված գործի շրջանակում կալանավորվածների թիվը հասել է չորսի։ Հուլիսի 8-ին իրավապահները քննչական գործողություններ էին իրականացրել ՀԷՑ-ում և ընկերության տնօրենների խորհրդի նախագահ Նարեկ Կարապետյանի տանը։
ՀՀ նախագահ Վահագն Խաչատուրյանը հուլիսի 8-ին ստորագրել էր ընկերության պետականացմանը միտված օրենքները։
Կարդացեք նաև՝
Սակագնի հետ կապված խնդիրներ, մեծ տույժեր․ Նարեկ Կարապետյանը՝ ՀԷՑ-ի պետականացման ռիսկերի մասին
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
