Էկոնոմիկայի նախարար Գևորգ Պապոյանը վրացական անցակետում աշխատող մաքսավորների հարցով դիմել է Հակակոռուպցիոն կոմիտե, գրել է «Հրապարակ» օրաթերթը։
Թերթը պարզաբանել է, որ ֆեյսբուքյան իր էջում նախարարը գրառումներ է արել ապրանքների արտահանման մասին, և դրանց տակ որոշ օգտատերեր մեկնաբանություն են գրել, որ վրացական անցակետում հայկական բեռնատարներից սահմանը հատելու համար կաշառք են պահանջում։
Պապոյանը դիմել է Հակակոռուպցիոն կոմիտե, որ գրառումներն ստուգվեն ու միջոցներ ձեռնարկվեն, այսինքն` բացահայտեն ենթադրյալ կաշառքի դեպքերն ու պատժեն վրացի պաշտոնյաներին։ Կոմիտեն թերթին հաստատել է, որ նախարարից նման դիմում է ստացվել։
Թերթը հավելել է, որ եթե անգամ վրացական մաքսակետում կոռուպցիոն բնույթի դեպքեր են լինում, դրանցով պետք է զբաղվի ոչ թե ՀՀ էկոնոմիկայի նախարարը, այլ Վրաստանի իրավապահները, և նախարարն իր վրացի գործընկերներից պետք է պահանջեր հետաքննել այդ ահազանգերը:
Ապրիլի կեսից Ռուսաստան և Բալթյան երկրներ արտահանման համար նախատեսված հայկական կոնյակով և այլ ալկոհոլային խմիչքներով բեռնատարները երկարատև ստուգումներ են անցնում տարանցիկ երկրում և մնում վրացական անցակետերում: Մայիսի 13-ին և մայիսի 21-ին Հայաստանից կոնյակ արտահանողները բողոքի ակցիաներ էին իրականացրել ՀՀ-ում Վրաստանի դեսպանատան շենքի առջև՝ պահանջելով լուծում տալ իրենց ապրանքի արտահանման ժամանակ առաջացած խնդիրներին։
Հունիսի 4-ին ՀՀ էկոնոմիկայի նախարար Գևորգ Պապոյանը հայտնել էր Վրաստանի շրջակա միջավայրի պաշտպանության և գյուղատնտեսության նախարար Դավիթ Սոնգուլաշվիլիի Հայաստան այցի մասին՝ իրավիճակը քննարկելու համար: Հունիսի 7-ին վրացի նախարարի այցը չեղարկվել էր։
