Փարիզի Սենա գետում հուլիսի 5-ից թույլատրվել է լողալ դրա համար հատկացված վայրերում, հայտնում է Le Monde-ը:
1923 թվականից ի վեր Սենայում արգելվում էր լողալ ջրի վատ որակի պատճառով: Լողալու համար հատկացվել է երեք թույլատրելի գոտի՝ Էյֆելյան աշտարակի մոտ, Սեն Լուի կղզու դիմաց և Բերսիում։ Եղանակային բարենպաստ պայմանների դեպքում դրանք հասանելի կլինեն մինչև օգոստոսի 31-ը:
«Իմ նախորդներից մեկը, լինելով Փարիզի քաղաքապետ, երազում էր, որ բոլորը կարողանան լողալ Սենայում։ Վաղը նրա խոստումը կկատարվի»,- հուլիսի 4-ին սոցցանցում գրել էր Ֆրանսիայի նախագահ Էմանուել Մակրոնը՝ ակնարկելով Ժակ Շիրակին, ով հայտարարել էր, որ կգա ժամանակ, երբ հնարավոր կլինի լողալ Սենայում:
Սենայում ջրի որակի բարելավումը մեծապես կապված է Օլիմպիական խաղերի նախօրեին Շամպինյի-սյուր-Մարն քաղաքում (Փարիզից մոտ 15 կմ հարավ-արևելք) կեղտաջրերի մաքրման կայանի բացման հետ:
