Խուզարկություններ «Տաշիր գրուպի» գլխավոր գրասենյակում՝ ՀԷՑ-ի աշխատակիցներին ուղղված Փաշինյանի սպառնալիքից հետո

Իրավապահները խուզարկություններ են իրականացնում «Տաշիր գրուպի» գլխավոր գրասենյակում, հայտնում են Armenia Today-ի աղբյուրները։ Armenia Today-ն ուղիղ հեռարձակում է իրականացնում գրասենյակից:

ՔԿ-ից Armenia Today-ին հաստատեցին խուզարկությունների մասին լուրը:

«Քննչական կոմիտեում քննվող քրեական վարույթի շրջանակներում կատարվում են անհետաձգելի քննչական գործողություններ»,- նշեց ՔԿ մամուլի խոսնակ Կիմա Ավդալյանը՝ չմանրամասնելով, թե ինչ վարույթի մասին է խոսքը։

Խուզարկություններին հաջորդել էր հուլիսի 2-ին վարչապետ Նիկոլ Փաշինյանի գրառումը, որով նա սպառնացել էր աշխատանքից ազատել «Հայաստանի էլեկտրական ցանցեր» ընկերության այն աշխատակիցներին, ովքեր «իրենց պարտականությունները կատարելու փոխարեն քաղաքական խարդավանքներով են զբաղվում»։

Փաշինյանն այս հայտարարությունն արել էր, երբ «Տաշիր» ընկերությունների խմբի առաջին փոխնախագահ Նարեկ Կարապետյանը հայտարարել էր Երևանում կայանալիք երթի մասին՝ երկրում տեղի ունեցած անարդարությունների և անօրինականությունների դեմ: Կարապետյանը քաղաքացիներին կոչ էր արել հուլիսի 4-ին՝ ժամը 18:00-ին, հավաքվել Երևանի Մաշտոցի պողոտայի «Սիզնս» (Մալիբու) այգու մոտ:

Նա հավելել էր, որ այնտեղից ակցիայի մասնակիցները կշարժվեն դեպի «ապօրինի կալանքի» տակ գտնվող «Տաշիր» ընկերությունների խմբի նախագահ Սամվել Կարապետյանի կալանավայր։

Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում:

Կարապետյանի ընտանիքը հունիսի 30-ին ՀՀ պետական մարմիններին պաշտոնապես ծանուցել էր ներդրումային վեճ սկսելու մասին: Նշվել է, որ Կարապետյանների ընտանիքը պահանջներ է ներկայացրել Կարապետյանի և նրա բիզնեսի դեմ վարչապետի կողմից սկսված արշավի պատճառով, որը հաջորդել էր գործարարի հարցազրույցին:

Կարդացեք նաև՝