Ռուսաստանի արտաքին գործերի նախարարությունը նոտա է հանձնել Ռուսաստանում Ադրբեջանի դեսպան Ռահման Մուստաֆաևին՝ պահանջելով Բաքվում ձերբակալված ռուս լրագրողներ Իգոր Կարտավիխի և Եվգենի Բելոուսովի ազատ արձակումը, ասված է գերատեսչության հաղորդագրության մեջ։
Ադրբեջանի դեսպանը Մոսկվայի ԱԳՆ շենք էր ժամանել այսօր առավոտյան և այնտեղ մնացել շուրջ մեկ ժամ։ Նրա այցի վերաբերյալ որևէ մեկնաբանություն չի հնչել, հայտնում են ադրբեջանական լրատվամիջոցները։
ՌԴ ԱԳՆ պաշտոնյաները հայտնել են, որ Մուստաֆաևի հրավիրման պատճառը Բաքվում ռուս լրագրողների «ապօրինի ձերբակալությունն» է և Ադրբեջանի կողմից իրականացված «ոչ բարեկամական գործողությունները»։ Նրանք նշել են նաև, որ Ադրբեջանի իշխանությունների սուր հայտարարությունները՝ կապված Ռուսաստանում ադրբեջանցիների ձերբակալման դեպքերի հետ, միջամտություն են ՌԴ ներքին գործերին։
Խոսքը վերաբերում է Եկատերինբուրգում 2001–2011 թվականներին տեղի ունեցած սպանությունների գործով ձերբակալված Ադրբեջանի քաղաքացիներին։ Ադրբեջանի ՆԳՆ աշխատակիցները հունիսի 30-ին խուզարկություններ և ձերբակալություններ են իրականացրել Sputnik Ադրբեջան գործակալության գրասենյակում՝ պնդելով, թե ձերբակալված լրագրողներն «իրականում ՌԴ Դաշնային անվտանգության ծառայության (ՖՍԲ) գործակալներ են, որոնք գործել են ԶԼՄ-ի անվան տակ»։
Այսօր Բաքվում ձերբակալվել է նաև ռուսաստանցիների մեկ այլ խումբ, ըստ Ադրբեջանի ՆԳՆ-ի՝ թմրանյութերի ապօրինի շրջանառության կասկածանքով։
