Հայաստանի պետական վերահսկողական ծառայության ղեկավար Ռոմանոս Պետրոսյանը չի բացառել «Հայաստանի էլեկտրական ցանցեր» ընկերության պետականացումը կամ մասնավոր բիզնեսին վաճառելը իշխանությունների կողմից դրա ազգայնացման դեպքում։
«Որպես քաղաքական ընկալում՝ պետությունը կարող է ինքը կառավարել, իրավասու է նաև մրցույթ հայտարարել, իրավասու է նաև պետական մասնաբաժին պահել։ Ոչինչ չեմ բացառում, ոչինչ որոշված չէ, որևէ որոշում այս պահին ինձ հայտնի չէ»,- ասել է նա։
ՊՎԾ ղեկավարի խոսքով՝ պետականացման գործընթացը խորհրդարանական նախաձեռնություն է լինելու։
Պետրոսյանը նաև հայտարարել է, որ ներկայումս սահմանված ժամկետ չկա ազգայնացման համար։ Պատասխանելով այդ դեպքում ՀԷՑ-ի սեփականատիրոջը փոխհատուցում վճարելու հնարավորության մասին հարցին՝ պաշտոնյան հայտարարել է, որ եթե օրենքով նախատեսված ընթացակարգերը նախատեսում են նման վճարում, ապա այն կկատարվի:
Այսօր ավելի վաղ ՀՀ վարչապետ Նիկոլ Փաշինյանը հայտնել էր, որ ՀԷՑ-ի պետականացման պլանը պատրաստ է և շուտով կմտնի գործնական փուլ։ Նա այս հայտարարությունն արել էր «Տաշիր» ընկերությունների խմբի նախագահ Սամվել Կարապետյանի հինգերորդ հայտարարությունից հետո:
Կարապետյանի շուրջ գործողությունների ֆոնին՝ վարչապետը հունիսի 18-ին հայտարարել էր, թե հասունացել է գործարարին պատկանող ՀԷՑ-ն ազգայնացնելու պահը:
Կարապետյանը, ում նկատմամբ իշխանությունների կողմից Հայ Առաքելական եկեղեցու արշավը քննադատելուց հետո ուժայինները գործողություններ էին սկսել, ավելի ուշ՝ նախքան ոստիկանություն տեղափոխվելը, հայտարարել էր, որ «շարունակելու է եկեղեցու, ժողովրդի կողքին լինել և թքած ունի ցանկացած ՀԷՑ-երի վրա»:
Փաշինյանն այս խոսքերը ևս հետագայում մեկնաբանել էր և եզրակացրել, թե «այսինքն՝ այս մարդիկ ՀԷՑ-ն իրենցը չեն էլ համարել և թքած ունեն այդ ռազմավարական նշանակության հիմնարկի, նրա սպառողների ու աշխատակիցների վրա»:
Ավելի ուշ կառավարության ղեկավարն ԱԺ-ում՝ ճեպազրույցի ժամանակ, հայտարարել էր, որ մեկ ամիս առաջ գործադիրի համապատասխան անդամներին ՀԷՑ-ի հետ կապված հանձնարարական էր տվել նախապատրաստելու կա՛մ վնասի փոխհատուցման ծրագիր քաղաքացիներին, կա՛մ ընկերությունն ազգայնացնելու, քանի որ մարզերում ՀԷՑ-ի հետ կապված խնդիրներ էր արձանագրել։ Փաշինյանը նաև ՀԷՑ-ի անջատումների մեջ երկրի ներսում հասարակական դժգոհություն հրահրելու նպատակ էր տեսել։
Նա հայտարարել էր, որ «Քաղաքացիական պայմանագիր» խմբակցությունը ՀԷՑ-ն ազգայնացնելու նախագիծ է ներկայացրել ԱԺ։
«Տաշիր» ընկերությունների խումբը ՀԷՑ-ի կառավարման պարտականությունն ամբողջությամբ իր վրա էր վերցրել 2015-ին, երբ ընկերությունն «Ինտեր ՌԱՕ»-ի հետ պայմանագիր էր ստորագրել ՀՀ էլեկտրաէներգետիկ ակտիվների առուվաճառքի վերաբերյալ։
Կարդացեք նաև
Սամվել Կարապետյանն արձագանքել է ՀԷՑ-ի բաժնետոմսերն ստանալու իշխանությունների ծրագրերի մասին լուրերին
ՀԷՑ-ի ղեկավարությունը պատմել է Երևանի էներգոհամակարգում ներդրումներ կատարելու ծրագրերի մասին
Սամվել Կարապետյանը խոսել է Երևանի կենտրոնում էլցանցի նոր համակարգ ստեղծելու ծրագրերի մասին
