ՀՀ վարչապետ Նիկոլ Փաշինյանը փորձում է երկրի տնտեսական իրավիճակից դժգոհ բոլոր մարդկանց «ուղղորդել» ընդդեմ «Տաշիր» ընկերությունների խմբի ղեկավար, բարերար Սամվել Կարապետյանի, հայտարարել է ՌԴ Պետդումայի ԱՊՀ հարցերով կոմիտեի նախագահի առաջին տեղակալ Կոնստանտին Զատուլինը «ՌԻԱ Նովոստի»-ին տված հարցազրույցում։
Քաղաքական գործչի խոսքով՝ Փաշինյանը մտածում է, թե ինչպես վերընտրվել 2026 թվականի հունիսին, և որպես նոր քարոզարշավ, պայքար, որի մեջ նա «մտադիր է խրել» ամբողջ Հայաստանը՝ պայքար է սկսել Հայ եկեղեցու դեմ։
«Փաշինյանի օրոք Հայաստանը չի կարող իրեն թույլ տալ խզել տնտեսական կապերը։ Այս տնտեսական կապերի շնորհիվ այն ցույց է տալիս կայուն տնտեսական աճ, հատկապես՝ հատուկ ռազմական գործողության ընթացքում, քանի որ այն դարձել է պատժամիջոցները շրջանցելու կենտրոն, քանի որ ռուս վերաբնակիչները գնացել են այնտեղ, բացել են բիզնեսներ և գումար ներդրել։ Այսինքն՝ նա շահում է, քանի որ տնտեսությունը մնում է փոխկապակցված Ռուսաստանի հետ, բայց քաղաքականապես պարոն Փաշինյանը գտնվում է բոլորովին այլ տեղում»,- հավելել է Զատուլինը։
Բացի այդ, պատգամավորը կարծում է, որ Կարապետյանը կկարողանա դառնալ հայ ժողովրդի առաջնորդը, և Փաշինյանն, իրականում, նրան հնարավորություն է տալիս իրեն հռչակել ոչ միայն որպես գործարար և բարերար, այլև որպես քաղաքական գործիչ։
«Ես ճանաչում եմ Կարապետյանին և վստահ եմ, որ նա անկեղծ է, երբ խոսում է իր քրիստոնեական արմատների, Հայ եկեղեցու նկատմամբ իր հարգանքի մասին: Հակառակը՝ Հայ Եկեղեցու նկատմամբ հայի անհարգալից վերաբերմունքը, իմ կարծիքով, ինչ-որ արտառոց բան է: Սա բարոյական արատավորության նշան է», – եզրափակել է խորհրդարանականը:
Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների հայտարարությունները, որից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։ Փաշինյանը խիստ էր արձագանքել Կարապետյանի հայտարարությանը:
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Խուզարկության մեկնարկից մոտ ութ ժամ անց՝ գիշերը ժամը երեքին, Կարապետյանը ոստիկանների ուղեկցությամբ դուրս էր եկել իր առանձնատնից և տեղափոխվել ՆԳՆ կազմակերպված հանցագործությունների դեմ պայքարի գլխավոր վարչություն, այնուհետև՝ Քննչական կոմիտե:
Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Ինքը՝ գործարարը, չի ընդունում մեղադրանքը և մտադիր է բողոքարկել այն բոլոր ատյաններում։ Կարապետյանի մամուլի ծառայությունն այս մեղադրանքներն անվանել էր ակնհայտ վախեցնելու և բռնաճշման փորձ։
Հունիսի 19-ին դատարանը երկու ամսով կալանավորել էր Կարապետյանին:
