Ատոմային էներգիայի միջազգային գործակալությունը (ԱԷՄԳ) Իրանի Ֆորդոու միջուկային օբյեկտի տարածքում, որը ռմբակոծվել էր ԱՄՆ ռազմաօդային ուժերի կողմից, հայտնաբերել է ներթափանցող անցք, սակայն ներկայումս անհնար է գնահատել ստորգետնյա ենթակառուցվածքների վնասը, հայտարարել է ԱԷՄԳ-ի գլխավոր տնօրեն Ռաֆայել Գրոսսին գործակալության կառավարիչների խորհրդի արտակարգ նիստի բացման ժամանակ։
«Ֆորդոյի օբյեկտում՝ Իրանի մինչև 60% ուրանի հարստացման հիմնական օբյեկտում, այժմ նկատվում են խառնարաններ, որոնք վկայում են թափանցող զինամթերքի օգտագործման մասին, ինչը համապատասխանում է ԱՄՆ հայտարարություններին: Այս պահին ոչ ոք, այդ թվում՝ Ատոմային էներգիայի միջազգային գործակալությունը, չի կարողանում գնահատել ստորգետնյա վնասը»,- իր ելույթում ասել է Գրոսսին:
Նա ընդգծել է, որ ստորգետնյա միջուկային օբյեկտում տեղադրված տեղակայանքների «տատանումների նկատմամբ չափազանց բարձր զգայունությունը» և ռումբերի պայթյունների հզորությունը բոլոր հիմքերը տալիս են ենթադրելու, որ ամերիկյան հարվածի վնասը «շատ զգալի կլինի»։
Իրանը տեղեկացրել է ԱԷՄԳ-ին, որ Ֆորդոյում, ինչպես նաև հարձակման ենթարկված մյուս երկու միջուկային օբյեկտներում, ճառագայթման մակարդակի աճ չի գրանցվել պարագծից դուրս։ Գործակալությունը շարունակում է վերահսկել իրավիճակը և իրանցի գործընկերներին կոչ է անում կապ պահպանել ԱԷՄԳ-ի գլխավոր գրասենյակի հետ և անհապաղ տեղեկացնել այն ցանկացած միջադեպի և արտակարգ իրավիճակի մասին։
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ Պաշտոնական Երևանը դատապարտել էր Իսրայելի միակողմանի հարձակումն Իրանի վրա։ Երկու կողմն էլ հայտնել է զոհերի և բազմաթիվ տուժածների մասին: Հունիսի 22-ի գիշերն ԱՄՆ-ն հարձակվել էր Իրանի երեք միջուկային օբյեկտի վրա։
