«Տաշիր» ընկերությունների խմբի նախագահ Սամվել Կարապետյանն իրեն կալանավորելու մասին դատարանի որոշումից հետո դիմել է աջակիցներին՝ ձերբակալությունն անօրինական անվանելով: Գործարարի հայտարարությունը դատարանի շենքի առաջ ընթերցել է փաստաբան Ռուբեն Հակոբյանը:
Կարապետյանը շնորհակալություն է հայտնել ներկաներին՝ իր ու ընտանիքի կողքին լինելու և աջակցելու համար։
«Ցավոք, դատարանը վառ օրինակ ծառայեց օրենքի և իրավական երկիր ունենալու հույսով ապրող մեր ազգին։ Ապացուցեց, որ դեռևս ընդունակ չէ գործել ինքնուրույն՝ հանուն արդարության և առանց հանձնարարությունների։ Կյանքիս ընթացքում հաջողություններին զուգընթաց ունեցել եմ նաև բազում դժվարություններ, սակայն հոգիս երբեք չի հանձվել»,- նշել է Կարապետյանը։
Նա շեշտել է, որ ապօրինի կալանքով, շինծու մեղադրանքով իրեն չեն կարող ճնշել, շեղել որդեգրած սկզբունքներից։
«Միշտ լինելու եմ ժողովրդիս, Հայ Առաքելական սուրբ եկեղեցու կողքին, ջանք ու եռանդ չեմ խնայել ու չեմ խնայելու հայրենիքիս և հայության կյանքը բարելավելու, բարեկեցիկ և անվտանգ ապագա կերտելու համար։ Մենք պառակտող չենք, այլ ազգը համախմբող ենք, ամուր եղեք, մեր հաղթանակին այլընտրանք չկա։ Առա՛ջ Աստված»,- ուղերձում նշել է նա։
Այսօր ավելի վաղ դատարանը երկու ամսով կալանավորել էր Կարապետյանին։ Նա դրանից երկու օր առաջ՝ հունիսի 17-ին, մեկնաբանել էր Հայ Առաքելական եկեղեցու դեմ Հայաստանի իշխանությունների արշավը, ինչին խիստ էր արձագանքել վարչապետ Նիկոլ Փաշինյանը: Հունիսի 17-ին իրավապահները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։ ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Գործարարի եղբայրը՝ նախկին պատգամավոր Կարեն Կարապետյանը, հայտնել էր, որ ավելի քան 45 անձ է բերման ենթարկվել, այդ թվում՝ ձեռքի կոտրվածքներով։ Կարապետյանի առանձնատան մոտ հարյուրավոր քաղաքացիներ էին հավաքվել՝ աջակցություն հայտնելու նրան։
Հունիսի 18-ի գիշերը «Տաշիր» ընկերությունների խմբի նախագահին իր տնից բերման էին ենթարկել ՆԳՆ ոստիկանության քրեական ոստիկանության գլխավոր վարչություն։ Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Ինքը՝ գործարարը, չի ընդունում մեղադրանքը և մտադիր է բողոքարկել այն բոլոր ատյաններում։ Կարապետյանի մամուլի ծառայությունն այս մեղադրանքներն անվանել է ակնհայտ վախեցնելու և բռնաճշման փորձ։
Մանրամասները՝ Armenia Today-ի տեսանյութում
