Իսրայելը հունիսի 14-ին շարունակել է հարվածներ հասցնել Իրանին՝ մեկ օր առաջ մեկնարկած ռազմական գործողության շրջանակներում:
Ռազմական գործողությունների ընթացքը և զոհերի թիվը
Իսրայելը հայտարարել է Իրանում 150 թիրախի ուղղությամբ հարվածներ հասցնելու մասին։ Reuters-ը, վկայակոչելով իսրայելցի զինվորականների ներկայացուցչին, հայտնել է, որ Իսրայելը «զգալի վնաս է հասցրել» Իրանի միջուկային օբյեկտներին Նաթանզում և Սպահանում, սակայն դեռևս հարվածներ չի հասցրել Ֆորդոյի օբյեկտին: Ատոմային էներգիայի միջազգային գործակալության (ՄԱԳԱՏԷ) տվյալներով՝ Սպահանի միջուկային օբյեկտում հրթիռակոծության հետևանքով վնասվել է 4 կրիտիկական նշանակություն ունեցող շենք: Բացի այդ, իսրայելական կողմը հայտարարել է, որ իրեն հաջողվել է «չեզոքացնել Իրանի ռազմական ղեկավարության բարձրագույն հրամանատարներին» և սպանել 9 իրանցի միջուկային գիտնականի:
Իսրայելը նաև հարված է հասցրել Իրանի Հարավային Բուշեր նահանգում գտնվող «Հարավային Փարս» գազային հանքավայրի շահագործման 14-րդ փուլի օբյեկտին, հայտնում է ՏԱՍՍ-ը՝ վկայակոչելով իրանական ԶԼՄ-ներին: Հարվածից հետո հանքավայրում արդյունահանումը դադարեցվել է։ Իրանական ԶԼՄ-ները հայտնել են Արևելյան Ադրբեջան, Արևմտյան Ադրբեջան, Քերմանշահ, Լորիստան, Թեհրան, Հորմոզգան և Խուզեսթան նահանգներում իսրայելական հարվածները հետ մղելու մասին:
Թեհրանը հունիսի 14-ին տեղեկացրել էր Իրանի հարավ-արևմուտքում գտնվող Շահիդ Չամրան քաղաքում իսրայելական հարվածից հետո շենքի փլուզման հետևանքով 60 մարդու, այդ թվում՝ 20 երեխայի զոհվելու մասին: Տեղական ԶԼՄ-ների տվյալներով՝ Իսլամական հեղափոխության պահապանների կորպուսի (ԻՀՊԿ) երեք զինծառայող զոհվել է Զենջան նահանգին Իսրայելի հարվածի հետևանքով, ևս երկու զինծառայող սպանվել է Մարկազի նահանգում:
Հունիսի 13-ից Իրանի Կարմիր մահիկի կազմակերպության 30 զինծառայող և մեկ աշխատակից է զոհվել Արևելյան Ադրբեջան նահանգում: Ավելի վաղ ՄԱԿ-ում Իրանի մշտական ներկայացուցիչ Էմիր Սաիդ Իրավանին հայտնել էր, որ հունիսի 13-ին Իրանում իսրայելական հարվածների հետևանքով 78 մարդ է զոհվել, ավելի քան 320-ը՝ վիրավորվել: Իսրայելական կողմը հայտարարել է 4 մարդու մահվան և ավելի քան 100-ի վիրավորվելու մասին՝ հունիսի 14-ի գիշերն Իսրայելի կենտրոնական շրջանում Իրանի հրթիռային հարվածից հետո:
Հակամարտության ընդլայնման վերաբերյալ կողմերի հայտարարություններն ու փոխադարձ սպառնալիքները
Հունիսի 14-ի ցերեկն Իսրայելի վարչապետ Բենիամին Նեթանյահուի գրասենյակը հայտարարել էր, որ երկրի բանակն ընդլայնում է լայնածավալ գործողությունն Իրանի տարածքում, իսկ Իսրայելի պաշտպանության նախարար Իսրայել Կացը հայտնել էր, որ Թեհրանը «կվառվի» Իսրայելի վրա հրթիռային հարվածների շարունակման դեպքում:
Իրանի խորհրդարանի ազգային անվտանգության և արտաքին քաղաքականության հանձնաժողովի անդամ Իսմայիլ Կոսարին հայտարարել է, որ Իրանը դիտարկում է Հորմուզի նեղուցը փակելու հնարավորությունը: Թեհրանը, ըստ իրանական ԶԼՄ-ների, նաև տեղեկացրել է ԱՄՆ-ին, Մեծ Բրիտանիային և Ֆրանսիային, որ իրանական հրթիռները ոչնչացնելու հարցում Իսրայելին օգնելու դեպքում տարածաշրջանում իրենց ռազմաբազաները նույնպես գնդակոծության կենթարկվեն:
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ ՀՀ ԱԳՆ-ն դատապարտել էր Իսրայելի հարձակումն Իրանի վրա։
