Փորձագետներն Իսրայելի կողմից Իրանի վրա հարձակման ֆոնին գնահատել են Հայաստանի հնարավոր քայլերը։ Իրանագետ Վարդան Ոսկանյանի կարծիքով՝ իրավիճակը լրացուցիչ անվտանգային մարտահրավերներ է ստեղծում Հայաստանի համար, ինչը հաշվի առնելով՝ պետք է առաջնահերթ քայլեր ձեռնարկել։
Մերձավոր Արևելքի ծայրահեղ լարված իրավիճակում, նրա խոսքով, Հայաստանում իշխանությունը պետք է գնա հանրային համերաշխության հաստատման ուղով։
«Չկա ոչ մի ավելի կարևոր խնդիր, քան մեր պետության և ազգի անվտանգությունն է։ ՀՀ ԶՈւ-երը պետք է բերվեն իրավիճակին համարժեք մարտական պատրաստության՝ հատկապես Նախիջևանում անցկացվող ադրբեջանա-թուրքական զորավարժությունների ֆոնին։ Դաշնակից պետությունների հետ պետք է սկսվեն փակ խողովակներով համակարգումներ։ Իրանական կողմի հետ պետք է պահվի մշտական կապ՝ դիվանագիտական և անվտանգային խողովակներով»,- նշել է իրանագետը։
Թյուրքագետ Վարուժան Գեղամյանը գրել է Հայաստանին սպառնացող վտանգների մասին՝ ընդգծելով, որ «Հայաստանը նստած է վառոդի տակառի վրա»։
«Եթե այս հարվածները շարունակվեն և վերաճեն լիարժեք պատերազմի, ապա Իրանին ճնշելու մյուս ամենահավանական կետը լինելու է Սյունիքը։ Այդ հարցում գործի է անցնելու Իսրայելի փաստացի դաշնակից հանդիսացող Ադրբեջանը, որին վերջին ամիսներին Իսրայելը բառացիորեն «լցոնել է» զենք-զինամթերքով»,- նշել է թյուրքագետը։
Գեղամյանը նույնպես պատահական չի համարել Թուրքիայի զինված ուժերի զորավարժությունները Նախիջևանում։ Թյուրքագետի կարծիքով՝ Թուրքիայի ԶՈւ ստորաբաժանումները «զորավարժության անվան տակ առնվազն մինչև հունիսի վերջ կմնան այնտեղ՝ ապահովելով Սյունիքի արևմտյան կողմի վրա ճնշումը»։
ԱԺ «Պատիվ ունեմ» խմբակցության պատգամավոր Տիգրան Աբրահամյանն ընդգծել է, որ տարածաշրջանը կրկին տեղափոխվում է ակտիվ սպառնալիքների էպիկենտրոն, որտեղ անկանխատեսելի իրադարձությունների տարափ է սպասվում:
Քաղաքական գիտությունների դոկտոր, պրոֆեսոր, էներգետիկ անվտանգության փորձագետ Վահե Դավթյանն էլ շեշտել է, որ եթե Իրանին հասցվի ռազմավարական պարտություն, այսպես կոչված «Զանգեզուրյան միջանցքը» դառնալու է ընդամենը ժամանակի հարց։
«Հայկական պետականության համար վերջինիս ռիսկերի մասին խոսելու կարիք չկա։ Այդ ռիսկերը հատկապես ընդգծվում են այս օրերին Նախիջևանում անցկացվող համատեղ թուրք-ադրբեջանական զորավարժությունների ֆոնին»,- շեշտել է Դավթյանը։
Իսրայելը հունիսի 12-ի լույս 13-ի գիշերը հարվածել է Իրանի մի շարք շրջանների, կան զոհեր և վիրավորներ: Իրանն, իր հերթին, ըստ ԶԼՄ-ների, ԱԹՍ-ներ է արձակել Իսրայելի ուղղությամբ:
