Ռուսաստանի արտգործնախարար Սերգեյ Լավրովն, իրականում, Հայաստան էր այցելել ոչ այնքան պաշտոնական հանդիպումների, որքան հասարակական տրամադրություններն ստուգելու համար, գրել է «Հրապարակ» օրաթերթը՝ հղում անելով իր աղբյուրներին։
Ըստ թերթի՝ ՀՀ վարչապետ Նիկոլ Փաշինյանի քայլերից ՌԴ-ին նկատելի է դարձել, որ նա առաջիկայում նոր զիջումների է գնալու, որոնք կարող են առնչվել նաև ռուսական շահերին և Կովկասում նրա գործոնի թուլացմանը։
Երևանի Սլավոնական համալսարանում հանդիպման ժամանակ Լավրովն ասել է, որ պատրաստ են վերաթարմացնել հարաբերությունները, եթե ՀՀ իշխանությունները ցանկանան։
«Ռուս պաշտոնյան չի թաքցրել, որ հայ-ռուսական հարաբերություններում վերջին տարիներին անջրպետ է առաջացել և ակնարկել է, որ Միրզոյանի՝ իրեն չդիմավորելն էլ իր համար անակնկալ չէր»,- նշել է թերթը։
Նույն աղբյուրի փոխանցմամբ՝ Լավրովը հերքել է Պրահայում Փաշինյանի որոշ հայտարարություններ։
Նա նշել է, որ 2020թ. նոյեմբերի 9-ի հայտարարությունը ՌԴ նախագահ Վլադիմիր Պուտինն անձամբ է խմբագրել, իսկ Լեռնային Ղարաբաղի պատկանելության հարցը դիտավորյալ դուրս է թողել։
«Ջենթլմենական համաձայնություն է կայացվել, որ ԼՂՀ կարգավիճակը կողմերի միջև հետագա քննարկման առարկա կդառնա»,- թերթի փոխանցմամբ՝ պարզաբանել է Լավրովը։
Փաշինյանը 2022-ին Պրահայում Արցախը ճանաչել էր Ադրբեջանի կազմում:
Մայիսի 22-23-ը Լավրովը Հայաստանում էր։ Նա Երևանում հայտարարել էր՝ Մոսկվան պատրաստ է օգնել ՀՀ-ին լուծել այն բոլոր հարցերը, որոնք կարգավորում են պահանջում Բաքվի հետ համաձայնագրի ստորագրման համար:
