Արցախից բռնի տեղահանված գրեթե 1090 ընտանիք բնակարանային ապահովման պետական աջակցության ծրագրով հավաստագիր է ստացել, Armenia Today-ի հարցմանն ի պատասխան՝ հայտնել են ՀՀ աշխատանքի և սոցիալական հարցերի նախարարությունից:
Գերատեսչությունից հստակեցրել են, թե, մասնավորապես, քանի արցախցի է դիմել և քանիսն են օգտվել բնակարանային ապահովման պետական աջակցության ծրագրից։
««Լեռնային Ղարաբաղից բռնի տեղահանված ընտանիքների բնակարանային ապահովման պետական աջակցության ծրագրի» շրջանակում ավելի քան 1800 ընտանիք արդեն իսկ դիմել է աջակցություն ստանալու նպատակով, որից 1090-ն ստացել է հավաստագիր, իսկ 144 հավաստագիր իրացվել է»,- մանրամասնել են նախարարությունից։
Ապրիլի 30-ին կառավարությունը երկարաձգել էր Արցախից բռնի տեղահանվածներին լրացուցիչ 2 ամսով սոցիալական աջակցություն տրամադրելու «40+10» ծրագիրը, որն ավելի վաղ կրճատվել էր, ինչի դեմ մարտի 29-ից արցախցիները հանրահավաք և ակցիաներ էին անցկացրել՝ պահանջելով շարունակել բնակվարձի փոխհատուցումը, ինչպես նաև երկարաժամկետ սոցիալական ծրագրեր նախաձեռնել։ Նույն օրը նրանք վրաններ էին տեղադրել «Ազատության» հրապարակում, որը հեռացրել էին ապրիլի 29-ին։
Կադացեք նաև՝
Ինչպե՞ս կարող են արցախցիներն օգտվել բնակարան գնելու աջակցության ծրագրից․ կառավարությունը հաստատել է կարգը
Կառավարությունն ընդլայնել է բնակավայրերի ցանկը, որով արցախցիները պետաջակցությամբ կարող են տուն ձեռք բերել
