Երևան քաղաքի առաջին ատյանի քրեական դատարանի նախագահող դատավոր Արման Հովհաննիսյանը «Իմնեմնիմի» փոդքասթի հաղորդավարներ Վազգեն Սաղաթելյանի և Նարեկ Սամսոնյանի գործով արդարացման որոշում է կայացրել, հայտնել է իրավապաշտպան, փաստաբան Ռուբեն Մելիքյանը։
2024-ի մարտին Քննչական կոմիտեն Սամսոնյանին և Սաղաթելյանին խուլիգանություն կատարելու հոդվածով մեղադրանք էր առաջադրել՝ հաղորդման ընթացքում իշխանության ներկայացուցիչների հասցեին «հայհոյանքներ և անպարկեշտ արտահայտություններ հնչեցնելու» համար։ Սամսոնյանը և Սաղաթելյանը 2 ամսով կալանավորվել էին։
2024-ի մայիսին փոդքասթին չմասնակցելու պայմանով նրանց ազատ էին արձակել։ Հունիսի 3-ին դատարանը մերժել էր նրանց խափանման միջոցը փոխելու և 3 ամսով կալանավորելու մասին դատախազների միջնորդությունը։ Նրանց նկատմամբ կիրառվել էր խափանման միջոց վարչական հսկողություն։ 2024-ի նոյեմբերին դատարանը վերացրել էր նրանց կողմից «Իմնեմնիմին» վարելու արգելքը։
