Պաշտոնական այցով Էստոնիայի մայրաքաղաք Տալլինում գտնվող Հայաստանի վարչապետ Նիկոլ Փաշինյանը գովաբանել է այդ երկիրը՝ նկատելով, թե որքան կոկիկ, խնամված կարող է լինել պետությունը։
«Նման բան կարող է լինել, եթե հավաքողի հետևից աղտոտողի խիստ պակաս կա, բառիս բուն իմաստով՝ դեֆիցիտ։ Կառուցող-նորոգողի հետևից ջարդող-փչացնողի խիստ պակաս կա, բառիս բուն իմաստով՝ դեֆիցիտ»,- գրել է նա։
Վարչապետը պատմել է, որ Էստոնիայի հայ համայնքի մի ներկայացուցիչ, որ ուսուցիչ է աշխատել տեղի դպրոցներում, իրեն ասել է. «Եթե էստոնացի աշակերտին հարցնես՝ ո՞րն է քո տունը, կպատասխանի՝ Էստոնիան»։
Կառավարությունից հայտնում են, որ Փաշինյանն Էստոնիայում հանդիպել է երկրի նախագահ Ալար Կարիսի հետ: Վերջինս նշել է հայ և էստոնացի ժողովուրդների միջև գոյություն ունեցող բազմադարյա կապերը՝ ընդգծելով, որ դրանք լավ հիմք են երկկողմ համագործակցության ընդլայնման համար:
Փաշինյանն էլ իր հերթին հավելել է, որ Հայաստանը բարձր է գնահատում մերձբալթյան հանրապետության հետ հարաբերությունները:
Նրանք անդրադարձել են նաև Հայաստան-Ադրբեջան խաղաղության գործընթացին: Փաշինյանը նշել է, որ Հայաստանը բարձր է գնահատում Էստոնիայի աջակցությունը Երևանի՝ տարածաշրջանում երկարատև խաղաղություն և կայունություն հաստատելու ջանքերին, ինչպես նաև Էստոնիայի հստակ դիրքորոշումը Հայաստանի տարածքային ամբողջականության պաշտպանության հարցում:
Կարիսը ողջունել է Հայաստանի և Ադրբեջանի միջև խաղաղության համաձայնագրի շուրջ ձեռք բերված համաձայնությունը և հույս հայտնել, որ այն հնարավորինս շուտ կստորագրվի: Նա վերահաստատել է իր երկրի աջակցությունը Հարավային Կովկասում երկարատև խաղաղության և կայունության ապահովման ջանքերին: Կողմերը մտքեր են փոխանակել նաև Հայաստան-Եվրոպական միություն հարաբերությունների հետագա զարգացման և համագործակցության ընդլայնման շուրջ:
Փաշինյանն Էստոնիա է մեկնել ապրիլի 27-ին։ Նույն օրը երեկոյան ՀՀ վարչապետը հանդիպում էր ունեցել տեղի հայկական համայնքի ներկայացուցիչների հետ։
