Ադրբեջանը Նախիջևանին կապելու համար Իրանի տարածքով էլեկտրահաղորդման գիծ կանցկացվի, հայտնել են ադրբեջանական ԶԼՄ-ները՝ նշելով, որ այդ մասին կողմերը հայտարարել են ապրիլի 8-ին՝ Ադրբեջանի փոխվարչապետ Շահին Մուստաֆաևի և Իրանի Իսլամական Հանրապետության ճանապարհների և քաղաքաշինության նախարար Ֆարզանա Սադեղիի հանդիպմանը։
Կողմերը վստահություն են հայտնել, որ էլեկտրահաղորդման գծի կառուցումը ոչ միայն կնպաստի էներգետիկ անվտանգության ապահովմանը, այլև մեծ ներդրում կունենա երկու երկրների միջև էլեկտրաէներգետիկայի ոլորտում համագործակցության ամրապնդման գործում:
Ապրիլի 9-ին Ադրբեջանում տեղի ունեցած «Դեպի նոր աշխարհակարգ» թեմայով միջազգային համաժողովում Ալիևն իր խոսքում նշել է, որ «էներգետիկան, տրանսպորտը, կանաչ էներգիան, անվտանգությունը, և տարածաշրջանի պետականության ու անկախության ամրապնդմանն ուղղված համատեղ ջանքերը միջազգային կարևոր գործոն են»։
Ապրիլի 8-ին իրանական և ադրբեջանական կողմերը քննարկել էին նաև քննարկել էին նաև «Հյուսիս-Հարավ» տրանսպորտային միջանցքի և Արաքս գետի վրայով անցնող կամրջի կառուցումը։ Նշել էին, որ Արաքս գետի վրայով Ադրբեջանի և Իրանի միջև կամրջի կառուցումը, որը սկսվել է 2023 թվականի հոկտեմբերին, կամրապնդի Նախիջևանի և Ադրբեջանի տրանսպորտային և առևտրային կապերը։
