ՈւԵՖԱ-ն Վրաստանի ֆուտբոլի ֆեդերացիային տուգանել է 40 հազար եվրոյով Թբիլիսիում կայացած Վրաստան-Հայաստան հանդիպման ժամանակ կարգապահական խախտումների համար, հայտնում է Sputnik Грузия-ն՝ հղում անելով Վրաստանի ֆուտբոլի ֆեդերացիային։
Բացի դրանից՝ ՈւԵՖԱ-ի որոշման համաձայն՝ Վրաստանն Ազգերի լիգայի 2026/27 մրցաշրջանի առաջին տնային հանդիպումը կանցկացնի առանց հանդիսատեսի։
Պատիժը չի տարածվում աշխարհի առաջնության ընտրական փուլի և ՖԻՖԱ-ի միջազգային ընկերական խաղերի վրա: Երկու տարվա ընթացքում խախտումների կրկնվելու դեպքում Վրաստանի հավաքականը հաջորդ հանդիպումը նորից կանցկացնի առանց հանդիսականների, հայտնում է Վրաստանի ֆուտբոլի ֆեդերացիան։
Մարտի 20-ին ՈւԵՖԱ-ի Ազգերի լիգայի խաղարկության անցումային փլեյ-օֆֆ փուլի առաջին խաղում Հայաստանի ֆուտբոլի ազգային հավաքականը Վազգեն Սարգսյանի անվան «Հանրապետական» մարզադաշտում 0։3 հաշվով պարտվել էր Վրաստանի ընտրանուն։ Մարտի 23-ին Թբիլիսիում կայացած պատասխան խաղում Հայաստանի հավաքականը զիջել էր 1։6 հաշվով։
ԶԼՄ-ները գրել էին, որ 1։6 հաշվով ավարտված խաղից հետո Թբիլիսիի «Դինամո Արենայում» լարված մթնոլորտ էր ստեղծվել, վրացի երկրպագուները հայերի ուղղությամբ իրեր են նետել։ Հրապարակվել էին նաև միջադեպի հետ կապված տեսանյութեր։ Վրաստանի ֆուտբոլի ֆեդերացիայի նախագահ Լևան Կոբիաշվիլին դատապարտել էր վրացի երկրպագուների պահվածքը։
