ՀՀ ՆԳՆ-ն հերքել է այն տեղեկությունը, որ Երևանի բնակչին անձնագրային բաժնում հրաժարվել են սոցիալական քարտ տրամադրել՝ Արարատ լեռան պատկերով ստորագրության պատճառով։
Փետրվարի 6-ին Yerkir.am-ը հայտնել էր, որ ՀՀ քաղաքացի, Երևանի Նոր Նորք վարչական շրջանի բնակիչ Սարո Լալայանին Միգրացիայի և քաղաքացիության ծառայության Նոր Նորքի բաժնում մերժել են սոցիալական քարտ տրամադրել՝ անձնագրում քաղաքացու ստորագրության վրա Արարատ լեռան պատկերի պատճառով։ Լրատվամիջոցը նշել էր, որ անձնագրայինի պետը կոչ է արել փոխել ստորագությունը, քանի որ «հիմա դա խնդիր է»։
ՆԳՆ-ից մանրամասնել են, որ հրապարակմամբ նշված անուն-ազգանունով քաղաքացի տվյալ ստորաբաժանումում չի սպասարկվել: Ըստ գերատեսչության՝ Միգրացիայի և քաղաքացիության ծառայության տվյալ ստորաբաժանման 8-րդ պատուհանն սպասարկում է Արցախից բռնի տեղահանված անձանց։
«ՆԳՆ ներքին անվտանգության և հակակոռուպցիոն վարչության ծառայողների կողմից անմիջապես կապ է հաստատվել քաղաքացու հետ, որի ընթացքում քաղաքացին տվել է իրարամերժ տեղեկություններ՝ չնշելով տվյալ ստորաբաժանում այցելելու կոնկրետ օր ու ժամ»,- ասվում է հաղորդագրության մեջ։
2023թ․ վարչապետ Նիկոլ Փաշինյանը հայտարարել էր՝ «խոսելով Արագածի և Արարատի մասին, խոսում եմ ՀՀ ինքնիշխան տարածք հանդիսացող և ինքնիշխան տարածք չհանդիսացող տարածքի մասին, քանի որ Արագած լեռը ՀՀ-ում է, Արարատը՝ ՀՀ տարածքում չէ»։
