Անկարայում հանդիպել են Ադրբեջանի և Թուրքիայի ցամաքային զորքերի հրամանատարները՝ Հիքմեթ Միրզոևը և Սելչուք Բայրաքթարօղլուն, հայտնում է Թուրքիայի ազգային պաշտպանության նախարարությունը։
Թե ինչ հարցեր են քննարկվել, մանրամասներ չեն հաղորդվում։
2024 թվականի դեկտեմբերի 24-ին Թուրքիայի և Ադրբեջանի պաշտպանության նախարարության ներկայացուցիչները հայտարարել էին համատեղ զորավարժությունների ինտենսիվության բարձրացման անհրաժեշտության մասին։ Միրզոևը և Բայրաքթարօղլուն Բաքվում կայացած հանդիպմանը քննարկել էին հետագա ռազմական համագործակցության հարցը։
Երկու երկրները համատեղ զորավարժություններ էին անցկացրել նաև նոյեմբերի վերջին՝ Թուրքիայի Մարմարիս քաղաքի «Աքսազ» ռազմածովային բազայում։
Հունվարի 23-ին Հայաստանի անվտանգության խորհրդի քարտուղար Արմեն Գրիգորյանը Բաքվի հայտարարությունները, զորավարժությունների անցկացումն ու Ադրբեջանին զենքի մատակարարումը Երևանի համար մտահոգիչ էր անվանել։
