Ընտրական գործընթացներում վարչական ռեսուրսի կիրառման ահազանգերի հիման վրա Արագածոտնի մարզի 4 դպրոցի տնօրենների նկատմամբ կիրառվել են կարգապահական տույժեր, հայտարարել է ՀՀ կրթության, գիտության, մշակույթի և սպորտի (ԿԳՄՍ) նախարար Ժաննա Անդրեասյանը։
Նա մանրամասնել է, որ ընտրական գործընթացի հետ կապված բոլոր ահազանգերը ԿԳՄՍ-ն փոխանցել է իրավապահ մարմիններին։ Բացի այդ, մարզպետարանների ենթակայությամբ գործող հաստատությունների դեպքում նախարարությունը նաև առաջարկություններ է ներկայացրել լիազոր մարմիններին։
Գերատեսչության ղեկավարն հիշեցրել է, որ «Հանրակրթության մասին» օրենքով դպրոցների տնօրենների համար հստակ ամրագրված է քաղաքական զսպվածության պահանջը, որը տարածվում է բոլորի վրա՝ անկախ նշանակման ժամկետից։ Նախարարը հայտնել է նաև նախատեսվող համակարգային փոփոխությունների մասին, որոնք կուժեղացնեն վերահսկողությունը դպրոցների նկատմամբ։
Անդրեասյանի խոսքով՝ 2026 թվականի սեպտեմբերից նախարարությունը կստանձնի մարզային բոլոր դպրոցների լիազոր մարմնի գործառույթները, իսկ 2027 թվականի սեպտեմբերից՝ նաև Երևանի կրթական հաստատությունների մասով, ինչը թույլ կտա խնդրո առարկա հարցերը պահել ուղիղ ուշադրության կենտրոնում։
Նախարարի պնդմամբ՝ կառավարման այս մոդելը թույլ կտա բացառել քաղաքական ներգրավվածությունը կրթական հաստատություններում։
Արագածոտնի մարզի մի շարք գյուղերի դպրոցների ուսուցիչները մայիսի 13-ին լրատվամիջոցների հետ զրույցում նշել էին, որ իրենց «Գազելներով» տեղափոխել են Ապարան, որպեսզի կարողանան մասնակցել «Քաղաքացիական պայմանագիր» կուսակցության քարոզարշավին։ Նրանք հայտնել էին, որ քարոզարշավին մասնակցելու նպատակով կրճատել են դասաժամերը։ ԿԳՄՍ-ից դեպքի վերաբերյալ հայտնել էին, որ քննություն է սկսել մանկավարժների, աշխատակիցների և աշակերտների՝ նախընտրական քարոզարշավին ներգրավվածության վերաբերյալ ստացված հաղորդումների հիման վրա։
Բացի այս դեպքից, դպրոցականների և ուսուցիչների՝ քարոզարշավի ժամանակ իշխող ուժի հանրահավաքներին ներգրավվելու այլ դեպքեր և ահազանգեր էին ստացվել։ Արարատի մարզի Վերին Արտաշատ գյուղի միջնակարգ դպրոցում մայիսի 21-ին դասերն ավելի շուտ էին ավարտվել, որպեսզի ուսուցիչներն ու աշակերտները կարողանան մասնակցել ՔՊ-ի նախընտրական քարոզարշավին:
Հունիսի 5-ին վարչապետի թեկնածու Արման Թաթոյանը հայտնել էր, որ Երևանի Րաֆֆու անվան թիվ 36 հիմնական դպրոցի ուսուցիչներին վարչական շրջանից սպառնացել են ազատել՝ ՔՊ-ի հանրահավաքին չմասնակցելու համար։ Մայիսի 26-ին Թաթոյանը Հանրային հեռուստատեսությամբ հրապարակել էր աուդիոձայնագրություն, որտեղ լսվում է, թե ինչպես է Գեղարքունիքի մարզի Մարտունու քաղաքապետարանի կրթության վարչությունը հրավիրում մանկապարտեզների տնօրեններին և վախեցնում նրանց՝ ստիպելով մասնակցել ՔՊ-ի գրասենյակի բացմանը:
