ՀՀ հակակոռուպցիոն կոմիտեն հայտնել է, որ ընտրակաշառքին առնչվող քրեական վարույթի շրջանակում մի շարք անձինք են ձերբակալվել։
Կոմիտեն, սակայն, չի հստակեցրել ձերբակալվածների թիվը և նրանց դատավարական կարգավիճակը։ Գերատեսչության վարկածով՝ ձերբակալված անձինք անցնում են «Բարգավաճ Հայաստան» կուսակցությանը վերագրվող ընտրակաշառքի գործով։
Ըստ կոմիտեի՝ ԲՀԿ-ի Վանաձորի տարածքային շտաբի ներկայացուցիչ հանդիսացող և կուսակցության անունից հանդես եկող անձը մի շարք ընտրողների ընտրակաշառք է տվել՝ կուսակցության օգտին քվեարկելու պայմանով։
Կառույցի տվյալներով՝ քրեական վարույթի շրջանակում կատարվել են խուզարկություններ և վարութային այլ գործողություններ։
Կոմիտեն նաև հրապարակել է ձայնագրության հատված, որում, ըստ կառույցի, զրուցում են ԲՀԿ-ի համակիրները։ Ձայնագրությունում շոշափվում են գումարների և մարդկանց ներգրավման հետ կապված հարցեր, ինչպես նաև հնչում է կուսակցության առաջնորդ Գագիկ Ծառուկյանի անունը։
Հունիսի 7-ին ՀՀ-ում անցկացվել էին Ազգային ժողովի ընտրություններ, որին մասնակցել էր 18 քաղաքական ուժ՝ 16 կուսակցություն և 2 դաշինք։ ԿԸՀ նախնական տվյալներով՝ 2 503 976 ընտրողից մասնակցել էր 1 477 736-ը (58,94%)։ Նախնական տվյալներով՝ անցողիկ շեմը հաղթահարել էր քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։ «Բարգավաճ Հայաստան» կուսակցությունը, որը նախնական արդյունքով չի հաղթահարել անցողիկ 4%-ի շեմը, վերահաշվարկ էր պահանջել։
Հունիսի 9-ին շուրջ 50 ընտրատեղամասում վերահաշվարկի դիմում էր ներկայացրել նաև «Ուժեղ Հայաստանը»։ «Հայաստան» դաշինքը վերջնական արդյունքների հրապարակումից հետո կդիմի Սահմանադրական դատարան։ Հունիսի 11-ին «Ուժեղ Հայաստանը» հայտարարել էր, որ դաշինքը կպահանջի չեղարկել ընտրությունների արդյունքները և վերանայել ՔՊ-ի ձայները։ Դաշինքը նաև վերաքվեարկություն էր պահանջել այն տեղամասերում, որոնց արդյունքները ԿԸՀ-ն հունիսի 11-ին անվավեր էր ճանաչել։
Ընտրությունների վերջնական արդյունքը կհրապարակվի հունիսի 14-ին՝ ինքնաշխատ եղանակով վերահաշվարկներից հետո։
Կարդացեք նաև՝
Ի՞նչ խախտումներ են արձանագրվել ընտրատեղամասերում
