Իսրայելի հարվածներից հետո Իրանում չեղարկվել են մի շարք չվերթեր

Իրանի մի շարք քաղաքներում պայթյուններ են լսվել, հայտնել է Iran International իրանական գործակալությունը։ 

Մասնավորապես, պայթյուններ են լսվել Թեհրանի արևելյան և հարավային շրջաններում, ինչպես նաև Քարաջում, Սպահանում և Թեհրանին հարակից մի շարք բնակավայրերում՝ Էսլամշահրում, Մալարդում, Քահրիզակում և Բաղեր Շահրում։

Ըստ գործակալության տեղեկությունների՝ առավոտյան հարված է հասցվել Իրանի արևմտյան Համեդան նահանգի Քաբուդարահանգ շրջանում գտնվող օբյեկտի։

Պայթյունի ձայն է լսվել Իրանի հարավում գտնվող Շիրազի օդանավակայանում։ Ավելի ուշ Mehr գործակալությունը հայտնել է, որ Շիրազի օդանավակայանում հարվածի հետևանքով պայթյուն չի գրանցվել։

Միևնույն ժամանակ՝ Շիրազի օդանավակայանը հայտարարել է բոլոր չվերթերը մինչև ժամը 20:00-ն չեղարկելու մասին։ Օդանավակայանը նշել է, որ ստեղծված իրավիճակի պատճառով թռիչքային գործողություններ չեն իրականացվում։

Քարմանշահի օդանավակայանում բոլոր չվերթերը չեղարկվել են մինչև հետագա ծանուցումը։ Ըստ հրապարակված տեղեկությունների՝ օդանավակայանն այս պահին թռիչքային որևէ գործողություն չի իրականացնում։

Ավելի վաղ Mehr-ը հայտնել էր Թեհրանի Մեհրաբադ օդանավակայանի բոլոր չվերթերի չեղարկման մասին՝ մինչև հետագա ծանուցում։ Հնդկաստանի դեսպանատունը Թեհրանում իր քաղաքացիներին խորհուրդ է տվել լքել Իրանը հասանելի տրանսպորտային միջոցներով։