Ավարտվել է 2022թ․ նոյեմբերի 3-ին Արմավիր-Երևան ճանապարհին չորս մարդու մահվան պատճառ դարձած ավտոպատահարի դեպքի առթիվ նախաձեռնված քրեական վարույթի նախաքննությունը, հայտնում է Քննչական կոմիտեն։
Այդ օրը՝ ժամը 18.50-ի սահմաններում, Մրգաշատ գյուղից դեպի Արմավիր քաղաք տանող ավտոճանապարհին միմյանց էին բախվել 61-ամյա տղամարդու կողմից վարած երթուղային «Գազել» և 46-ամյա տղամարդու կողմից վարած «Զիլ» մակնիշի ավտոմեքենաները, որի հետևանքով ստացած մարմնական վնասվածքներով Արմավիրի ԲԿ բուժօգնության էին տեղափոխվել «Գազել» մակնիշի ավտոմեքենայի 9 ուղևոր, իսկ 4 ուղևոր մահացել էր։
Քննությամբ փաստական տվյալներ են ձեռք բերվել այն մասին, որ «Գազել» մակնիշի ավտոմեքենայի վարորդը Երևան-Արմավիր ավտոճանապարhով միջքաղաքային ուղևորափոխադրում իրականացրել է իր վարած տրանսպորտային միջոցի տեխնիկական բնութագրով նախատեսված քանակից ավելի՝ առնվազն 26 ուղևորներով: Մրգաշատ գյուղի խաչմերուկից անց՝ դեպի Արմավիր քաղաք տանող ճանապարհահատվածում, վարորդը երթևեկել է թույլատրելի առավելագույն արագությունն էականորեն գերազանցող՝ շուրջ 70,75կմ/ժ արագությամբ:
ՔԿ-ն մանրամասնում է, որ երթևեկության համար վտանգն առաջանալու պահից, այն է՝ «Գազել» մակնիշի ավտոմեքենայի վարորդը, իր վարած ավտոմեքենայի երթևեկության ուղղությամբ հետադարձի պատրաստվող «Զիլ» մակնիշի ավտոմեքենան հայտնաբերելու պահից սկսած, ժամանակին միջոցներ չի ձեռնարկել իր վարած տրանսպորտային միջոցի արագությունն իջեցնելու՝ ընդհուպ մինչև այն կանգնեցնելու ուղղությամբ։
Արդյունքում՝ ավտոմեքենայի ձախակողմյան կողային հատվածներով բախվել է այդ պահին ստատիկ վիճակում գտնվող «Զիլ» մակնիշի ավտոմեքենայի հետին աջակողմյան հատվածին՝ դրանով իսկ պայմանավորելով ճանապարհատրանսպորտային պատահարի առաջացումը և ինքն իրեն զրկելով այն կանխելու տեխնիկական հնարավորությունից։
«Ուղևորներից չորսը ստացել էին կյանքի հետ անհամատեղելի մարմնական վնասվածքներ, ևս 9 անձ, տարբեր աստիճանի մարմնական վնասվածքներով, տեղափոխվել էին բժշկական կենտրոն: Վարորդին մեղադրանք է ներկայացվել։ Նրա նկատմամբ որպես խափանման միջոց ընտրվել է տնային կալանք և գրավ»,- հայտնում է կոմիտեն հավելելով, որ նախաքննությունն ավարտվել է, և վարույթի նյութերը, մեղադրական եզրակացությամբ, ուղարկվել են դատարան:
