Իրանը մերժել է ԱՄՆ-ի առաջարկը միջնորդների միջոցով վարվող բանակցություններում, հայտարարել է միջազգային և իրավական հարցերով Իրանի փոխարտգործնախարար Քազեմ Ղարիբաբադին, փոխանցել է Mehr-ը։
Ըստ նրա՝ ամերիկյան կողմը չափազանց շատ բան է պահանջել։
«Ամերիկյան կողմը հայտարարեց, որ եթե այս ծրագիրը մերժվի, բանակցությունները ձախողված կհամարվեն, և իրենք կլքեն դրանք։ Ի վերջո, այդպես էլ եղավ՝ ամերիկյան պատվիրակությունը հեռացավ բանակցություններից»,- ասել է Ղարիբաբադին։
Նա ընդգծել է, որ իրանական պատվիրակությունը չի պնդել բանակցությունների շարունակումը՝ դա համարելով «Իրանի Իսլամական Հանրապետության արժանապատիվ դիվանագիտություն»։
Փոխարտգործնախարարը նաև հայտնել է, որ Օմանում բանակցությունները կայացել են այն բանից հետո, երբ Իրանը կրկին փակել է Հորմուզի նեղուցը։ Ըստ նրա՝ մյուս կողմը պնդում էր, որ հարավային երթուղին բաց մնա մինչև իրանա-օմանական բանակցությունների ավարտը, սակայն իրանական պատվիրակությունը չի ընդունել այդ առաջարկը։
«Մենք հստակ հայտարարեցինք, որ ինչպիսին էլ լինի բանակցությունների արդյունքը, Իրանի Իսլամական Հանրապետության սկզբունքային քաղաքականությունը պարզ էր պատերազմի հենց սկզբից, և նման առաջարկներ չեն ընդունվի»,- պարզաբանել է Ղարիբաբադին։
ԱՄՆ նախագահ Դոնալդ Թրամփը հուլիսի 27-ին հայտարարել էր, որ Իրանի հետ բանակցություններն ընթանում են «շատ բարեկամական մթնոլորտում»։
ԱՄՆ-ն ու Իսրայելը պատերազմ են սկսել Իրանի դեմ փետրվարի 28-ին։ Հունիսին Վաշինգտոնն ու Թեհրանը ստորագրել էին փոխըմբռնման հուշագիր, որը նախատեսում է բոլոր ճակատներում, այդ թվում՝ Լիբանանում, ռազմական գործողությունների անհապաղ դադարեցում։ Սակայն հուլիսի 8-ի գիշերը ԱՄՆ-ը վերսկսել է լայնածավալ հարվածները Իրանին՝ նրան մեղադրելով ձեռք բերված պայմանավորվածությունների այն դրույթների խախտման մեջ, որոնք վերաբերում են Հորմուզի նեղուցին։
