«Բարգավաճ Հայաստան» կուսակցության առաջնորդ, գործարար Գագիկ Ծառուկյանին պատկանող «Մուլտի Վելնես» մարզասրահի շենքն անցել է Երևանի քաղաքապետարանին, Factor TV-ին հայտնել է Երևանի քաղաքապետ Տիգրան Ավինյանը։
Ավինյանի խոսքով՝ պատճառը համայնքային հողի վրա թույլ տրված շինարարական խախտումներն են։ Նրա տվյլաներով՝ շինությունը կառուցված է համայնքային տարածքի վրա՝ 60-րդ հոդվածով սահմանված անօտարելի հողի վրա։
Նա տեղեկացրել է, որ այդ հիմքով կողմերից մեկը՝ Երևանի քաղաքապետարանը, խզել է ավելի վաղ կնքված պայմանագիրը, և շենքն ամբողջությամբ անցել է Երևանի քաղաքապետարանին։ Ավինյանը նաև տեղեկացրել է, որ մտադիր են շենքը շահագործել որպես համայնքային մարզման կենտրոն՝ սոցիալական բաղադրիչով։
Ավինյանը Ծառուկյանի մարզասրահի հետ կապված որոշումը չի կապել գործարարի նկատմամբ գործընթացների հետ՝ նշելով, որ «Մուլտի Վելնեսին» առնչվող հանգամանքները քաղաքային իշխանությանը հայտնի են դարձել շուրջ մեկ տարի առաջ։
Հունիսին 19-ին ԶԼՄ-ները գրել էին, որ քաղաքապետարանը ծանուցում է ուղարկել «Մուլտի Ուելնես» ընկերությանը՝ կառուցապատման իրավունքի պայմանագրից հրաժարվելու մասին։ Այդ ժամանակ Ծառուկյանը դեռ չեր կալանավորվել և ԶԼՄ-ները չէին բացառել, որ «Մուլտի Ուելնեսի» հետ կապված քայլերը կարող են միայն սկիզբը լինել։
Դեպքերի հաջորդականությամբ ԶԼՄ-ների կանխատեսումներն իրականություն դարձան։ Վարչապետ Նիկոլ Փաշինյանի և Ծառուկյանի միջև հեռակա բանավեճը, որը սկսվել դեռ նախընտրական փուլում, հետընտրական փուլում նույնպես շարունակվեց։ Փաշինյանը նախընտրական փուլում հայտարարել էր, որ «միլիարդատեր» քաղաքական գործիչները պետք է սնանկանան՝ նկատի ունենալով նաև Ծառուկյանին։
Հուլիսի 6-ի առավոտյան Ծառուկյանի բնակարանում, ինչպես նաև ավելի քան 70 ընկերությունում խուզարկություններից հետո նրան ձերբակալել էին, հուլիսի 7-ին նրան կալանավորել էին։ «Մուլտի Վելնեսը», ի թիվս Ծառուկյանի բազմաթիվ այլ ընկերությունների, կապարակնքվել էր այս խուզարկություններից հետո։ Մարզասրահի աշխատակիցներն այն բացելու ակցիա էին իրականացրել։ Ծառուկյանի ձեռարկությունները շարունակում են փակ մնալ, զուգահեռ իրականացվում են ակցիաներ՝ դրանք բացելու պահանջով, «Արարատցեմենտ» ընկերությունը դատարանը հանձնել է պետության կառավարմանը։
Ծառուկյանը ներգրավված է առանձնապես խոշոր չափերով հարկերից խուսափելու, ինչպես նաև ենթադրյալ փողերի լվացման վարույթներում։ Ծառուկյանին մեղադրում են նաև ապօրինի որսի մեջ, և այդ վարույթի շրջանակում նրա առաձնատնից առգրավվել էին կենդանիների խրտվիլակներ, ինչպես նաև 3 առյուծ և 1 վագր, առյուծներից մեկը քնեցումից չէր արթնացել։ Ծառուկյանն իրեն առաջադրված մեղադրանքներն անվանել է «սուտ» և «փուչիկ»։
Կարդացեք նաև՝
Պետությունը հարկադրաբար մարդկանց զրկում է աշխատատեղերից․ «Մուլտի Ուելնես»-ի աշխատակից
