«Քաղաքացիական պայմանագիր» կուսակցության՝ ընտրություններում սահմանադրական մեծամասնություն չձևավորելու փաստը քննարկումների տեղիք է տվել նաև իշխող թիմի ներսում, գրել է «Հրապարակ» թերթը՝ հղում անելով իր աղբյուրներին։
Պարբերականի փոխանցմամբ՝ կուսակցության որոշ ներկայացուցիչներ կարծում են, որ այս արդյունքները թույլ չեն տա վարչապետ Նիկոլ Փաշինյանին կտրուկ քայլեր ձեռնարկել Ռուսաստանի դեմ։
Թերթը նշել է, որ ստեղծված իրավիճակը ձեռնտու է նաև Երևանի քաղաքապետ Տիգրան Ավինյանին։
Ըստ հրապարակման՝ մինչ քվեարկությունը ՔՊ-ում մտադրություն են ունեցել ընտրություններից հետո փոխել Ավինյանին, քանի որ սահմանադրական մեծամասնություն ստանալու դեպքում նախատեսվել էր նոր ընտրություններ կազմակերպել մի շարք համայնքներում, այդ թվում՝ մայրաքաղաքում։
Սակայն, ըստ պարբերականի, ընտրությունների արդյունքները փոխել են իշխող ուժի ծրագրերը, և ՔՊ-ն որոշել է զերծ մնալ նման քայլերից։
Ըստ ընտրությունների պաշտոնական արդյունքների՝ Քաղաքացիական պայմանագիրն ստացել է 49,7456% (726 818 ձայն), «Ուժեղ Հայաստան» դաշինքը՝ 23,271% (340 006 ձայն), իսկ «Հայաստան» դաշինքը՝ 9,9231% (144 983 ձայն)։ Ըստ ԿԸՀ-ի՝ ԱԺ-ում մանդատները բաշխվել են հետևյալ կերպ. ՔՊ-ն ստացել է 64 մանդատ, «Ուժեղ Հայաստան» կուսակցությունների դաշինքը՝ 29 մանդատ, «Հայաստան» դաշինքին բաժին է հասել 12 մանդատ։
Վարչապետը հունիսի 11-ին հայտարարել էր, որ Ազգային ժողովի ընտրություններից հետո ձևավորվելիք կառավարության կազմում մեծ փոփոխություններ չեն նախատեսվում։
