ՀՀ վարչապետ Նիկոլ Փաշինյանը կառավարության ճեպազրույցի ժամանակ դատական համակարգին մեղադրել է կոռուպցիայի մեջ՝ մեկնաբանելով 2017 թվականի ապրիլի խորհրդարանական ընտրություններում ընտրակաշառքի գործով «Բարգավաճ Հայաստան» կուսակցության առաջնորդ Գագիկ Ծառուկյանի նկատմամբ կայացված արդարացման դատավճիռը։
«Ի՞նչ ա նշանակում՝ բռնել և արդարացնել Գագիկ Ծառուկյանին ընտրակաշառքի գործով։ Որևէ մեկն ուզում է ասել, որ որևէ մեկը նրան ձրի բռնել արդարացրել ա՞։ ․․․Ես համակարգին մեղադրում եմ կոռումպացված լինելու մեջ»,- ասել է Փաշինյանը։
Վարչապետը նաև հայտարարել է, որ կոռումպացված դատավորները պատասխանատվության կենթարկվեն։
«Անունները կհրապարակվեն ըստ քրեական գործերի, երբ նման գործեր լինեն»,- հավելել է նա։
Մեկնաբանելով խորհրդարանական ընտրությունների արդյունքները՝ Փաշինյանը հերքել է վարչական ռեսուրսի կիրառման մասին հայտարարությունները և նշել, որ «Քաղաքացիական պայմանագրի» արդյունքը քաղաքացիների աջակցության արդյունք է։ Միևնույն ժամանակ՝ նա ընդդիմությանը մեղադրել է ընտրակաշառքի մեջ։
Փաշինյանը նաև կոչ է արել կոռուպցիոն գործերով անցնող անձանց պահել կալանքի տակ առնվազն մինչև 2031 թվականին կայանալիք հաջորդ խորհրդարանական ընտրությունների պաշտոնական արդյունքների ամփոփումը։
Վարչապետի խոսքով՝ մինչև այդ ժամկետը նման մեղադրյալների ազատ արձակումը կնշանակի, որ «դատաիրավական համակարգը գործում է պետության դեմ», և պետությունը պետք է դրան արձագանքի։
Հունիսի 7-ին ՀՀ-ում անցկացվել էին Ազգային ժողովի ընտրություններ, որին մասնակցել էր 18 քաղաքական ուժ՝ 16 կուսակցություն և 2 դաշինք։ ԿԸՀ նախնական տվյալներով՝ 2 503 976 ընտրողից մասնակցել էր 1 477 736-ը (58,94%)։ Նախնական տվյալներով՝ անցողիկ շեմը հաղթահարել էր քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։
«Բարգավաճ Հայաստան» կուսակցությունը, որը նախնական արդյունքով չի հաղթահարել անցողիկ 4%-ի շեմը, վերահաշվարկ էր պահանջել։ Հունիսի 9-ին շուրջ 50 ընտրատեղամասում վերահաշվարկի դիմում էր ներկայացրել նաև «Ուժեղ Հայաստանը»։ «Հայաստան» դաշինքը վերջնական արդյունքների հրապարակումից հետո կդիմի Սահմանադրական դատարան։
Ընտրությունների վերջնական արդյունքը կհրապարակվի հունիսի 14-ին՝ ինքնաշխատ եղանակով վերահաշվարկներից հետո։
«Ուժեղ Հայաստանը» հայտարարել էր, որ ԿԸՀ տվյալները չեն արտացոլում ընտրությունների իրական արդյունքները։ Ընդդիմությունը վարչապետ Նիկոլ Փաշինյանին մեղադրել էր իշխանության յուրացման փորձի և ԿԸՀ-ին ճնշելու մեջ։
Կարդացեք նաև՝
Ի՞նչ խախտումներ են արձանագրվել ընտրատեղամասերում
