«Ուժեղ Հայաստան» դաշինքի վարչապետի թեկնածու Սամվել Կարապետյանը հայկական հեռուստաալիքներին տված հարցազրույցում մեկնաբանել է Ադրբեջանի հետ նոր հակամարտության հնարավորության, Հայաստանում հետընտրական գործընթացների, Ռուսաստանի հետ հարաբերությունների և Ադրբեջանում պահվող հայ գերիների մասին հարցերը։
Նոր պատերազմի հնարավորության և Անկարայի ու Բաքվի հետ հարաբերությունների կարգավորման գործընթացի վերաբերյալ
«Ես վստահեցնում եմ, որ սեպտեմբերին պատերազմ չի լինի, որովհետև սեպտեմբերին Փաշինյանը (ՀՀ վարչապետ Նիկոլ Փաշինյան-խմբ․) չի լինի։ Հայաստանին սպառնում է երկու մարդ՝ Ալիևը (Ադրբեջանի նախագահ Իլհամ Ալիև-խմբ․) և Փաշինյանը»,- ընդգծել է Կարապետյանը՝ մեկնաբանելով իշխանությունների հայտարարություններն առաջիկա խորհրդարանական ընտրություններում ընդդիմության հաղթանակի դեպքում նոր պատերազմի հնարավորության մասին։
Մեկնաբանելով իշխանության գալու դեպքում Անկարայի և Բաքվի հետ հարաբերությունների կարգավորման հարցում իր գործողությունների մասին հարցը՝ Կարապետյանն ընդգծել է, որ նրանք չեն կրկնի ներկայիս իշխանությունների կողմից թույլ տրված սխալները՝ իրենց «մեծամտությամբ, անկարողությամբ»։
«Մենք վարելու ենք արժանապատիվ, ճիշտ բանակցություններ, բերելու ենք գերտերությունների երաշխավորությունը, որովհետև վստահ եմ՝ Հայաստանի նման պետությունը, չունենալով լուրջ երաշխավորություն, դառնալու է գործիք Ալիևի ձեռքերում։ Դրա համար այդ ուղղությամբ վարելու ենք ճիշտ քաղաքականություն, լավ հարաբերություններ ենք ստեղծելու գերտերությունների, տարածաշրջանային բոլոր երկրների հետ և ունենալու ենք արժանապատիվ, երկարատև խաղաղություն»,- հայտարարել է նա։
Պատասխանելով ադրբեջանական գերությունից Արցախի նախկին պետնախարար Ռուբեն Վարդանյանի վերադարձնելու հնարավոր ջանքերի մասին հարցին՝ Կարապետյանը նշել է, որ առանց պետական լծակների անհնար է ազդել հարևան երկրում տեղի ունեցող ապօրինության վրա։
«Շատ շուտով արդարությունը Հայաստանում հաղթելու է, արդարադատությունը հաղթելու է և, ձևավորելով կառավարություն, ամեն ինչ անելու ենք, որ մեր հայրենասեր հայրենակիցները բոլորը վերադառնան Հայաստան»,- ասել է նա՝ վստահություն հայտնելով, որ միայն իր ղեկավարած կուսակցությունը կարող է դա անել՝ օգտագործելով միջազգային ազդեցությունը։
Քաղաքականություն մտնելու և վարչապետի միասնական ընդդիմադիր թեկնածուին աջակցելու պատճառների մասին
Կարապետյանը կրկին մեկնաբանել է վարչապետի մեկ այլ ընդդիմադիր թեկնածուի աջակցելու հնարավորությունը։ Նա հիշեցրել է «Հայաստան» դաշինքի և «Բարգավաճ Հայաստան» կուսակցության կողմից նախկինում արված հայտարարությունները՝ առավելագույն քվե ստացած ընդդիմադիր ուժին աջակցելու պատրաստակամության մասին։
«Քանի որ մենք վստահ ենք մեր հաղթանակի վրա, դա նշանակում է, որ իրենց հայտարարությունը մեր մասին էր»,- ընդգծել է «Ուժեղ Հայաստանի» առաջնորդը։
Խոսելով քաղաքականություն մտնելու պատճառների մասին՝ Կարապետյանը շեշտել է, որ դրանք կապված են իշխանությունների գործողությունների հետ։
«Եթե չլիներ իմ նկատմամբ քրեական հետապնդումը, եթե չլիներ Փաշինյանի վերջին տարվա անկանոն շարժումները, հարձակումները թե՛ մարդկանց, թե՛ մեր ինքնության վրա, ես նույնիսկ ամենավատ երազում չէի պատկերացնի ինձ քաղաքական դաշտում։ Բայց եթե հարցը մեր Հայաստանը կորցնելն է, բոլոր ցանկությունները, լավ կյանքի բոլոր ամբիցիաները երկրորդ պլան են գնում»,- ասել է նա։
«Ուժեղ Հայաստանի» սոցիալ-տնտեսական ծրագրի իրականացման միջոցները
Կարապետյանը նշել է, որ իր դաշինքը կսկսի իրականացնել իր սոցիալ-տնտեսական ծրագիրը Հայաստանի մարզերում։
«Չի լինելու առաջին և հիմնական քայլ, լինելու է միանգամից քայլերի շարք՝ ամեն օր, ամեն ժամ, որպեսզի կարողանանք ապահովել մեր ժողովրդի բարեկեցությունը»,- հայտարարել է նա։
«Ուժեղ Հայաստանի» առաջնորդը շեշտել է, որ, ի տարբերություն ներկայիս կառավարության, իր դաշինքն իշխանության կբերի «արդեն հարստացած մարդիկ, ովքեր հարստանալու կարիք չունեն»։
«Մենք հարստացնելու ենք հայ ժողովրդին, ի տարբերություն ներկա իշխանությունների, ովքեր բյուջեն լցնում են սեփական գրպանները»,- հայտարարել է նա։
Ռուսաստանի կողմից հնարավոր ճնշման և աջակցության մասին
Մեկնաբանելով կառավարության հայտարարությունները, որ Ռուսաստանը, ընտրվելու դեպքում, կարող է ճնշում գործադրել իր վրա՝ ռազմավարական ակտիվները Ռուսաստանին հանձնելու համար, Կարապետյանը նշել է, որ նախկինում ինքը վերադարձրել է Հայաստանին ռազմավարական կարևոր ակտիվներ՝ ՀԷՑ-ը, Հրազդանի ՋԷԿ-ը և Սևան-Հրազդան կասկադը:
«Հիմա ես եմ վերադառնում Հայաստան»,- ասել է նա:
Կարապետյանը հավելել է, որ բացարձակապես չի մտահոգվում Մոսկվայի կողմից Ռուսաստանում իր ակտիվների միջոցով ճնշման հնարավորությամբ:
«Իսկ եթե կիրառեն, այդ դեպքում նույնպես բացարձակ մտահոգ չեմ»,- ասել է «Ուժեղ Հայաստանի» առաջնորդը:
Պատասխանելով Ռուսաստանի նախագահ Վլադիմիր Պուտինի կողմից իր թեկնածությանն աջակցելու մասին հարցին՝ Կարապետյանը նշել է, որ Հայաստանի ներկայիս իշխանությունների ապօրինի գործողությունները հայտնի են ամբողջ աշխարհում, և Ռուսաստանում դա բարձրաձայնվել է ամենաբարձր մակարդակով:
«Քանի որ Փաշինյանն այսօր ամեն ինչ անում է, որ Հայաստանը դարձնի գերտերությունների բախման կենտրոն, հետագա լուռ ծրագրերով, ստեղծելով քաոս, Հայաստան բերելով 300 000 ադրբեջանցիների, իսկ մենք հասկանում ենք, որ 300 000 ադրբեջանցի բերելով՝ ստիպված ենք լինելու հայկական բանակում ունենալ ամենաքիչը 10 000 ադրբեջանցի ծառայող, իսկ մենք շատ լավ ենք հիշում Սաֆարովի (2004թ․ Բուդապեշտում հայ սպա Գուրգեն Մարգարյանին կացնահարած Ռամիլ Սաֆարով-խմբ․) Հունգարիայում կատարածը։ Դրա համար մեզ պետք է նոր, ուժեղ առաջնորդություն, որպեսզի կարողանանք հավասարակշռել մեր բոլոր միջազգային գործընկերներին և, վստահ եղեք, շատ շուտով դա ունենալու ենք»,- ասել է Կարապետյանը:
