«Առաջարկ Հայաստանին» դաշինքի նախընտրական ցուցակը գլխավորելու է ԲՀԿ նախագահ Գագիկ Ծառուկյանը, բայց վարչապետի թեկնածուն ինքը չէ, լրագրողներին հայտնել է Ծառուկյանը։ Նրա հիշեցրել է, որ վարչապետի չորս թեկնածու ունի, որոնց թվում ինքը չկա։
Ծառուկյանը շեշտել է, որ չի պատկերացնում նախկին և գործող իշխանությունների հետ համագործակցությունն ընտրություններից հետո։ Նա բացառել է նախկին նախագահ Ռոբերտ Քոչարյանի գլխավորած ուժին միանալը և ասել, որ կքննարկի Սամվել Կարապետյանի գլխավորած «Ուժեղ Հայաստանի» հետ համագործակցության հարցը:
Պատասխանելով վարչապետ Նիկոլ Փաշինյանի կողմից հնչեցված «բելառուսամետ օլիգարխ» որակմանը՝ Ծառուկյանը նշել է, որ Բելառուսի նախագահ Ալեքսանդր Լուկաշենկոն իր ընկերն է, և նա ցանկացած հարցով հայ ժողովրդի կողքին է։
Ծառուկյանը նշել է, որ ամեն օր շփվում է ժողովրդի հետ և նրանք ցանկանում են կայացած, պաշտոնի չձգտող անձի շուրջ համախմբվել։
«Դրա համար ասում եմ, որ անձնական որևէ հարց չունեմ, ոչ մի պաշտոնի հակում չունեմ։ Կարևորը մանդատը չէ, կարևորն սկզբունքն է»,- ասել է նա։
ԲՀԿ համագումարում Ծառուկյանը վերընտրվել է նախագահ։ Համագումարում«Առաջարկ Հայաստան»-ին ներկայացրել է նաև նախընտրական ցանկը։ Հնչել են պատգամավորի թեկնածուների անուններ՝ Գագիկ Ծառուկյան, Լիանա Մանուկյան, Հրաչյա Ռոստոմյան, Արման Աբովյան, Միքայել Մելքումյան, Իվետա Տոնոյան, Գևորգ Ստեփանյան, Վահե Հովհաննիսյան, Էլինար Վարդանյան, Սուրեն Սուրենյանց, Մարտուն Գրիգորյան, Մետաքսյա Բաբայան, Արմեն Մանուկյան, Արա Այվազյան, Լուիզա Սարգսյան, Անդրանիկ Թևանյան։ Ծառուկյանն ավելի ուշ հայտնել է, որ նախընտրական ցուցակում առաջինն ինքն է լինելու, երկրորդը՝ Թևանյանը, երրորդը՝ Սարգսյանը։
Ծառուկյանը մարտի 12-ին Armenia Today-ին հայտնել էր, որ իր առաջնորդած ուժը 2026 թվականի ընտրություններում վարչապետի 4 թեկնածու ունի։ Նա բացառել էր իշխանությունների հետ համագործակցությունը։
Խորհրդարանական ընտրությունները Հայաստանում տեղի կունենան հունիսի 7-ին։
Կարդացեք և դիտեք նաև
Ընտրական դաշտի նոր քարտեզը
