Վարչապետ Նիկոլ Փաշինյանը հայտարարել է Ռուսաստանի նախագահ Վլադիմիր Պուտինի հետ հունիսի երկրորդ կեսին նոր հանդիպում անցկացնելու պայմանավորվածության մասին։ Այս մասին վարչապետը հայտնել է ապրիլի 9-ին կայացած ճեպազրույցի ժամանակ՝ ամփոփելով ՌԴ առաջնորդի հետ ունեցած վերջին բանակցությունների արդյունքները։ Ճեպազրույցը հեռարձակվել է Armenia Today-ի YouTube-յան ալիքով։
Հատկանշական է, որ հանդիպումը նախատեսված է հունիսի առաջին կեսին Հայաստանում կայանալիք խորհրդարանական ընտրություններից հետո։
Փաշինյանի փոխանցմամբ՝ կողմերը քննարկել են հետագա շփումները և պայմանավորվել բարձր մակարդակի բանակցությունների շուրջ։ Նա, ընդհանուր առմամբ, հաջողված է համարել ռուսաստանյան իր այցը։
Մոսկվայում ապրիլի 1-ին կայացած հանդիպմանը կողմերը, ըստ պաշտոնական հաղորդագրության, քննարկել էին տնտեսական համագործակցությանը, Հայաստան-ԵՄ հարաբերություններին, ՀՀ-ում նախընտրական գործընթացներին և հայ-ադրբեջանական հարաբերությունների կարգավորմանը վերաբերող հարցեր։ Հանդիպման փակ մասը տևել էր մոտ երկու ժամ։ ՌԴ նախագահի մամուլի քարտուղար Դմիտրի Պեսկովը զրույցն անվանել էր անկեղծ, իսկ ԱԳ նախարար Սերգեյ Լավրովը նշել էր, որ Երևանն իրազեկվել է առանձին հարցերի վերաբերյալ Մոսկվայի մտահոգությունների մասին։
Անդրադառնալով հայկական երկաթուղու կոնցեսիոն կառավարման հնարավոր փոփոխության մասին լուրերին՝ Փաշինյանն այսօր շեշտել է, որ Երևանը որևէ գործողություն չի ձեռնարկում Մոսկվայի թիկունքում կամ ի վնաս նրա շահերի։
«Մտադիր չենք որևէ բան անել Ռուսաստանի թիկունքում և ընդդեմ Ռուսաստանի։ Առնվազն այս փուլում, քանի դեռ երկխոսության հնարավորությունները մնում են լայն և բաց, մենք կշարունակենք աշխատանքը»,- նշել է վարչապետը։
Փաշինյանը հավելել է, որ Ղազախստանը դեռևս օգոստոսից հետաքրքրություն է ցուցաբերում TRIPP («Թրամփի ուղի հանուն միջազգային խաղաղության և բարգավաճման») նախագծի նկատմամբ, քանի որ այն վերաբերում է միջազգային տրանսպորտային երթուղիների զարգացմանը։ Ըստ նրա՝ խոսքը նոր տարանցիկ հնարավորությունների ձևավորման մասին է, որոնք հետաքրքրում են մի շարք երկրների։
Նա ընդգծել է, որ Հայաստանը պատրաստ է տարբեր երկրներին առաջարկել իր տարածքով անցնող երթուղիներն արտահանման, ներմուծման և լոգիստիկ ծառայությունների համար։ Այն ենթադրում է նաև համագործակցություն տարածաշրջանի երկրների, այդ թվում՝ Ադրբեջանի, Վրաստանի, Իրանի և Թուրքիայի հետ։
Փաշինյանը փետրվարին հայտնել էր, որ իշխանությունները դիտարկում են երկաթուղու կոնցեսիոն կառավարումը Երևանի և Մոսկվայի հետ բարեկամական հարաբերություններ ունեցող երրորդ երկրի փոխանցելու հնարավորությունը: Հնարավոր տարբերակների թվում նա նշել էր Ղազախստանը, ԱՄԷ-ն և Կատարը: Ընդ որում, ըստ նրա, երկաթուղին մնում է Հայաստանի սեփականությունը, իսկ կառավարման մոդելի վերանայումը պայմանավորված է տարածաշրջանային տրանսպորտային նախագծերում երկրի մրցունակությունը բարձրացնելու ձգտմամբ:
