ՀՀ վարչապետ Նիկոլ Փաշինյանը և Արտաքին գործերի նախարար Արարատ Միրզոյանը ԱԺ-Կառավարություն հարցուպատասխանի ժամանակ անդրադարձել են Հայաստանի և Ադրբեջանի միջև հարաբերությունների կարգավորման գործընթացում միջազգային երաշխավորների հնարավոր ներգրավմանը՝ անվանելով այն ռիսկային։
Վարչապետը մերժել է երաշխավորների անհրաժեշտության գաղափարը՝ հայտարարելով, որ դա երկրին սպառնում է կախվածության մեջ ընկնել նրանցից, ովքեր հանդես կգան որպես խաղաղության երաշխավոր:
«Հայաստանի համար երաշխավոր կա, դա ՀՀ քաղաքացին է։ Մինչև 2018 թվականը մեզ երաշխավոր կանգնածները մեզ տարել են կառափնարան, և մենք զոհողության ենք գնացել իրենց շահերին, մեզ հորթի վզից գցած պարանով ուր ուզում՝ տանում էին»,- նշել է նա:
Միրզոյանը նույնպես անդրադարձել է ընդդիմադիր քաղաքական ուժերի կողմից երաշխավորների միջնորդությամբ Հայաստանի անվտանգության ամրապնդմանը։ Նրա խոսքով՝ խաղաղությունն ամրապնդվում է երկկողմանի շահավետությամբ, իսկ երաշխավորները հետապնդում են սեփական շահը, ինչը ցույց է տվել պատմությունը:
«Հիմա կա խաղաղություն, և փորձը ցույց է տալիս, որ դա ամրապնդվում է, եթե կա երկկողմանի շահավետություն։ Հիմա մեր խնդիրն այն է, որ ստեղծենք փոխադարձության, համագործակցության, նոր կապերի մթնոլորտ, որտեղ և՛ Հայաստանի, և՛ Ադրբեջանի համար շահավետ կլինի առհավետ պահպանել խաղաղությունը։ Մենք արդեն, կարծես թե, տեսնում ենք այդ մեխանիզմները և՛ երկկողմ առևտրի, և՛ քաղահասարակության ներկայացուցիչների միջև հանդիպումներում և այլն»,- հայտարարել է նա։
Նախարարը հավելել է, որ «ինչ-որ երաշխավորների միջոցով» խաղաղությունը չի բխում ՀՀ շահերից:
Փաշինյանը նաև հայտարարել է, որ իր գնահատմամբ՝ ընդդիմության թեզերը վկայում են իր մրցակիցների՝ Ղարաբաղյան շարժումը շարունակելու մտադրության մասին, ինչը կարող է հանգեցնել նոր պատերազմի։
Վարչապետի դիտարկմամբ՝ նմանատիպ մոտեցում է անհրաժեշտ նաև Անկախության հռչակագրի հարցում, որի վերաբերյալ հանրությունը պետք է հստակեցնի իր դիրքորոշումը։
«Այսօր «Քաղաքացիական պայմանագիրը» միակ քաղաքական ուժն է, որ հստակ ասում է՝ չենք շարունակելու Ղարաբաղյան շարժումը։ Ժողովուրդը պետք է որոշի, որ այդ շարժումը շարունակվում է, ինչը նշանակում է պատերազմ։ Եթե որոշում է, որ խաղաղություն, ապա այդ շարժումն այլևս չի շարունակվում։ Սա շատ պարզ ընտրություն է»,- ասել է նա:
2025 թվականի օգոստոսին Երևանի և Բաքվի միջև խաղաղության պայմանագրի նախաստորագրումից հետո Բաքուն հայտարարել էր, որ այն վերջնականապես ստորագրելու համար Հայաստանը պետք է ընդունի նոր Սահմանադրություն՝ առանց Անկախության հռչակագրի։ Վարչապետը բազմիցս հանդես է եկել Անկախության հռչակագիրը նոր Սահմանադրության տեքստից հանելու օգտին:
