«Ուժեղ Հայաստան» կուսակցության քաղաքական խորհրդի անդամ Նարեկ Կարապետյանը պատասխանել է Իրան-Իսրայել հակամարտության սրման, իսրայելա-ադրբեջանական համագործակցության ֆոնին Հայաստանի անվտանգության ծրագրի մշակմանն իսրայելցի մասնագետ Զվիկա Խայմովիչի ներգրավման քննադատությանը:
Կուսակցությունը ծրագիրն ու դրա մշակմանը մասնակցած փորձագետներին ներկայացրել էր մարտի 18-ին Երևանում:
Նրա խոսքով՝ կուսակցությունը ելնում է զինծառայողների անվտանգության ապահովման առաջնահերթությունից և մտադիր է ներգրավել միջազգային առաջատար փորձագետների: Հենց այս տրամաբանությամբ Հայաստանի ՀՕՊ համակարգի վերականգնման ծրագրի մշակմանն է ներգրավվել իսրայելցի մասնագետը:
Կարապետյանը նշել է, որ Խայմովիչն աշխարհի հակաօդային պաշտպանության 5 լավագույն մասնագետներից է՝ ընդգծելով, որ նրան և իր թիմին ներգրավելու համար մեծ ջանքեր են գործադրվել։ Նա նաև հիշեցրել է, որ 2020 թվականին հայկական կողմի կորուստների զգալի մասը կապված էր ՀՕՊ համակարգի թերությունների հետ և հավելել, որ Հայաստանը պետք է զարգացնի համագործակցությունը՝ հաշվի առնելով տարածաշրջանի այլ երկրների փորձը:
«Երբ ձեր որդիները լինեն դիրքերում, իրենց գլխավերևում՝ Բայրաքթար, այդ ժամանակ էլ կասեք՝ ինչո՞ւ եք բերել մասնագետի, որը պետք է այդ Բայրաքթարը չեզոքացնելու տարբերակներ առաջարկի։ Թե՞ կասեք, որ դա ճիշտ որոշում էր։ Այդ մոտեցմամբ էին առաջնորդվում 2020-ին, երբ հայկական ուժերն ամբողջությամբ դուրս չէին եկել դիրքեր, որովհետև կենտրոնից Ադրբեջանին չսադրելու հրաման էր եկել»,- հայտարարել է Կարապետյանը։
Նա հավելել է, որ նման մոտեցումը հանգեցրել էր անձնակազմի և տեխնիկայի զգալի կորուստների 44-օրյա պատերազմի արդեն իսկ առաջին օրը:
Կարապետյանն ընդգծել է իրենց թիմի և գործող իշխանությունների մոտեցումների տարբերությունը երկրի անվտանգության ապահովման հարցում։
«Մենք ասում ենք՝ զինվորի կյանքն ու անվտանգությունն առաջնային են, իրենք առաջնային են համարում քաղաքական նպատահահարմարությունը»,- նշել է նա։
Ըստ կուսակցության խորհրդի անդամի՝ թիմը մտադիր է հասնել լիարժեք ՀՕՊ համակարգի ստեղծմանը ոչ թե հայտարարությունների մակարդակով, այլ գործնականում:
«Հասկանալու համար՝ իրապես ունե՞նք պաշտպանված երկինք մինչև պատերազմը, թե՞ ոչ, պետք է դիմել աշխարհի լավագույն ՀՕՊ համակարգն ունեցող երկրին և ներգրավել դրա ստեղծողներին պրոֆեսիոնալ խորհրդատվության համար։ Այս պահին այդ երկիրն Իսրայելն է»,- ասել է Կարապետյանը։
Նա նաև մեկնաբանել է Իսրայելի և տարածաշրջանի երկրների հարաբերությունների հետ կապված մտավախությունները՝ նշելով, որ նման կապերը ձևավորվում են համագործակցության միջոցով, և Հայաստանը պետք է գնա նույն ճանապարհով:
Նախօրեին ծրագրի շնորհանդեսի ժամանակ Խայմովիչը հայտարարել էր, որ ազգային անվտանգության համակարգը պետք է հաշվի առնի ժամանակակից սպառնալիքները, ներառյալ՝ անօդաչու թռչող սարքերն ու հրթիռային համակարգերը և համադրի տեխնոլոգիական լուծումները պաշտպանական մոտեցումների փոփոխության հետ: Նրա խոսքով՝ ծրագիրը պետք է դառնա գործնական ուղեցույց որոշումների կայացման համար:
Միջոցառմանը ելույթ ունեցած հատուկ ստորաբաժանումների պատրաստման հույն մասնագետ Էֆտիմիս Տուրտիդիսն, իր հերթին, ընդգծել էր, որ անվտանգության մակարդակն ուղղակիորեն կախված է զինված ուժերի պատրաստվածությունից և հատուկ ստորաբաժանումների դերից:
«Ուժեղ Հայաստանը» կուսակցության նախագահ Սամվել Կարապետյանի առաջնորդությամբ մարտի 18-ին ներկայացրել էր «Ուժեղ խաղաղություն» անվտանգային ծրագիրն ու հայտարարել թիմին միացած միջազգային փորձագետների, այդ թվում՝ Խայմովիչի մասին։
Խայմովիչը Կարապետյանի թիմում ներգրավված է հակաօդային պաշտպանության և ժամանակակից սպառնալիքներին դիմակայելու ռազմավարության մշակման ուղղությամբ։ Նա ավելի քան երեք տասնամյակ ծառայել է Իսրայելի ռազմաօդային ուժերում, 2015-2018 թվականներին ղեկավարել է երկրի ՀՕՊ համակարգը։ Խայմովիչն իր ելույթում հայտարարել էր, որ ուժեղ անվտանգությունը հնարավոր է միայն ուժեղ առաջնորդության, ճիշտ որոշումների և միասնական աշխատանքի շնորհիվ։
