ԱՄՆ փոխնախագահ Ջեյ Դի Վենսն առաջին գործող ամերիկացի փոխնախագահն է, որ այցելել է Հայաստան:
Այցի ընթացքում հանդիպել է վարչապետ Նիկոլ Փաշինյանին, ստորագրվել են միջուկային էներգետիկայի և ռազմական-տեխնոլոգիական համագործակցության պայմանավորվածություններ, ինչպես նաև խոսվել է խաղաղության գործընթացի և տարածաշրջանային տրանսպորտային նախագծերի մասին։ Այցը նաև հակասություններ է առաջացրել, օրինակ՝ Հայոց ցեղասպանության հիշատակի մասին գրառման ջնջումը։
Armenia Today-ը հարցում է իրականացրել Երևանում՝ հետաքրքրվելով, թե քաղաքացիների կարծիքով՝ Հայաստանն անվտանգության առումով պետք է ավելի շատ ԱՄՆ-ի՞, թե՞ ՌԴ-ի վրա հենվի, ինչպես նաև ԱՄՆ-ից զենք գնելը կուժեղացնի՞ Հայաստանի անվտանգությունը։
Քաղաքացիների կարծիքները տարբեր էին. ոմանք նշել են՝ Հայաստանը պետք է անվտանգության առումով հենվի միայն ԱՄՆ-ի վրա, քանի որ Ռուսաստանից այլևս սպասելիքներ չունեն։
«Երևի Ամերիկայի, որովհետև Ռուսաստանն արդեն իրեն ցույց տվեց»,- պատասխանել է հարցման մասնակիցներից մեկը:
Մյուսների կարծիքով՝ Ռուսաստանը Հայաստանի միակ դաշնակիցն է, և հենց Մոսկվան կարող է լուծել Հայաստանի անվտանգային հարցերը։
«Մեզ ավելի մոտ է Ռուստաստանը։ Իսկ զենքի առումով ցանկացած տեղից գնելը գովելի է»,- ասել է քաղաքացիներից մեկը:
Մեկ ուրիշը ևս, ով ՀՀ-ի բարեկամն է համարում Ռուսաստանը, նշել է՝ ԱՄՆ-ն ֆիզիկապես էլ հեռու է:
«Ամերիկան մինչև գա, հասնի, այստեղ արդեն բան չի մնա»,- ասել է նա:
Քաղաքացիների երրորդ խումբը գտնում է, որ Հայաստանի հույսը պետք է լինի հենց իր քաղաքացին։
«Ուժեղ պետության համար պետք է համախմբված հասարակություն»,- շեշտել է հարցման մասնակիցը:
Մանրամասները՝ տեսանյութում։
